Seyid Camal Əzimbəyli: “Xüsusən də müharibə şəraitində olan ölkə üçün bunun əhəmiyyəti daha böyükdür”
Bu gün dünyanın dinamik inkişaf edən ölkələri sırasında layiqli yerini tutan Azərbaycanda, bütün sahələrdə olduğu kimi, ordu quruculuğunda da əhəmiyyətli nailiyyətlər əldə olunub.
Sözügedən sahədə həyata keçirdiyi islahatlar və maddi-texniki təchizat sayəsində Azərbaycan Ordusu nəinki bölgənin, hətta Avropanın bir çox ölkələrinin silahlı qüvvələrindən öndə durur. Azərbaycanda ordu sıralarında ölkənin keşiyində duran, onun inkişafında xidmətlər göstərən hərbi qulluqçuların problemlərinin həll edilməsi də dövlətin qarşısında duran prioritetdir. Əlbəttə ki, bütün məsələlərdə olduğu kimi, burada da Azərbaycan dövləti üzərinə düşən vəzifələri yerinə yetirir və hərbi qulluqçuların mənzil-məişət problemləri uğurla həll edilir.
Ölkənin iqtisadi potensialı gücləndikcə, Azərbaycanın hərbi qüdrətinin artırılması istiqamətində ardıcıl və mühüm işlər görülür, ordu quruculuğu sahəsində tədbirlər uğurla davam etdirilir. Belə ki, hər cür infrastrukturu olan hərbi şəhərciklərin tikilməsi, hərbi qulluqçuların sosial məsələlərinin, mənzil-məişət problemlərinin həlli bir daha sübut edir ki, həyatını Vətəni müdafiə etmək kimi şərəfli vəzifəyə həsr edən hərbi qulluqçular hərtərəfli dövlət qayğısı ilə əhatə olunublar. Bunun nəticəsidir ki, bir necə il əvvəl ölkə Prezidenti orduda qüsursuz xidmət edən hərbçilərə pulsuz mənzil verilməsi ilə bağlı fərman imzaladı. Silahlı Qüvvələrdə 1992-ci ildən etibarən 20 il və daha çox qüsursuz xidmət etmiş 1279 hərbi qulluqçuya Azərbaycan Prezidentinin Fərmanı ilə indiyədək dövlət tərəfindən Bakıda 629, Gəncədə 632, Naxçıvanda 18 mənzil verilib. Bütün bunlar Silahlı Qüvvələrə dövlətin göstərdiyi yüksək qayğı və diqqətin mücəssəməsidir. Bu yöndə aparılan siyasəti və göstərilən sosial qayğını ekspertlər necə dəyərləndirirlər?
Məsələyə münasibət bildirən şərqşünas Seyid Camal Əzimbəylinin sözlərinə görə, hərbçilərin mənzil şəraitinin yaxşılaşdırılması ilə bağlı görülən sistemli işlər təqdirəlayiqdir: “O üzdən, bununla bağlı görülən işləri alqışlayıram. Hesab edirəm ki, ölkə başçısının bu qərarı ordumuza verilən dəyərdir. Bu, ölkədə milli vətənpərvərlik ruhunun yüksəlməsinə əlavə stimul verir. Göstərilən diqqət, birmənalı olaraq, dövlətin qayğısının təzahürüdür. Xüsusən də müharibə şəraitində olan ölkə üçün bunun əhəmiyyəti daha böyükdür. Ölkə başçısının apardığı uğurlu siyasət bütün sahələrdə, o cümlədən ordu quruculuğunda özünü doğruldur. Belə sərəncam və fərmanların verilməsi, icra olunması ordunun daha da güclənməsinə xidmət edir. Hərbçilərə dövlət başçısının verdiyi dəyər bir daha onu gündəmə gətirir ki, o, proqramlı və sistemli siyasət yeridir. Milli mənafelər üçün zəruri olan bütün addımlar atılır. Nəzərə almaq lazımdır ki, hərbçi peşəsi çox çətin və spesifik sahədir. Bu sahədə hər adam uzun müddət xidmət edə bilmir. Hərbçilərimizin bir qismi cəbhə bölgəsində xidmət edir. Onların mənzil şəraitinin dövlət vəsaiti hesabına yaxşılaşdırılması hərbçilərdə ruh yüksəkliyini artırır. Bu da, öz növbəsində, vətənin daha da etibarlı şəkildə qorunmasına öz müsbət təsirini göstərir. Biz istərdik ki, bütün hərbçilərin mənzil və məişət problemləri öz həllini tapsın. Ancaq hər şey mövcud imkanlardan asılıdır. Reallıq ondan ibarətdir ki, Azərbaycan dövləti bu istiqamətdə nə mümkündürsə, onu edir. İnanıram ki, zamanla bütün bu məsələlər öz həllini tapacaq. Ona görə də bununla bağlı dövlətin həyata keçirdiyi uğurlu siyasəti alqışlayıram”.
Vidadi ORDAHALLI
