Fikrət Yusifov: “Çoxsaylı yeni məktəb və tibb müəssisələri tikilib”
Əhalinin yüksək rifahının təmin olunmasına yönəlmiş konkret tədbirlər sistemi olan sosial siyasət mürəkkəb struktura və çoxşaxəli mexanizmə malikdir. Bu siyasətin hər hansı bir göstəricisini əsas götürərək, bütövlükdə, cəmiyyətin inkişafı barədə fikir yürütmək olar. Hər bir cəmiyyət öz inkişafına uyğun olaraq sosial siyasəti formalaşdırır və bu siyasətin həyata keçirilməsi üçün zəruri şəraitin yaradılmasını təmin edir.
Baş verən ictimai, iqtisadi və digər inkişaf reallıqları sosial siyasətin mahiyyətinin zənginləşməsində mühüm rol oynayır. Sosial siyasətin qarşısına qoyulmuş məqsədlərə nail olmaq üçün onun həyata keçirilməsi mexanizminin böyük əhəmiyyəti var. Bu mexanizmin əsas elementi iqtisadiyyatı inkişaf etdirməkdir. Çünki iqtisadiyyatda uğur qazanmadan, yüksək maliyyə imkanlarına nail olmadan sosial siyasəti lazımi səviyyədə inkişaf etdirmək mümkün deyil.
Müasir dövrdə sosial siyasətin parametrlərini müəyyən edən bir sıra indikatorlar var. Bunlar məşğulluq, sosial təminat, təhsil, səhiyyə, mənzil şəraiti, əməyin mühafizəsi, istirahət, asudə vaxtın təşkili və sairdir. Bu tərkib hissələrinin hər birinin özü müxtəlif, lakin bir-birinə bağlı məsələləri özündə birləşdirir. Prezident İlham Əliyevin iqtisadi sferada həyata keçirdiyi siyasətin indi də özünü qabarıq göstərən ən önəmli cəhətlərindən biri hər zaman sosialyönümlülük faktorunun ön plana çəkilməsidir. Çünki Azərbaycan cəmiyyətində insan dövlətin əsas kapitalıdır və həyata keçirilən hər bir tədbirin mərkəzində də ölkə vətəndaşı dayanır. İnsana qayğı, onun maddi, mənəvi tələbatlarının ödənilməsi üçün zəruri şəraitin yaradılması aparılan siyasətin mühüm prinsiplərindəndir.
Son 10 ildə Azərbaycanda sosial müdafiə, təhsil, səhiyyə sahəsində aparılan uğurlu sosial siyasət ciddi nəticələrin əldə olunmasına gətirib çıxarıb. Belə ki, təhsil, səhiyyə infrastrukturu əhəmiyyətli dərəcədə yenilənib. Bütün bunlar dövlət vəsaiti hesabına təmin edilib. Aztəminatlı şəxslərin sosial vəziyyətini yaxşılaşdırmaq üçün bir sıra mexanizmlər işə salınıb və ötən illərin təcrübəsi göstərir ki, bunlar özünü doğruldur.
Bütün bunların fonunda, Azərbaycanda sosial sferada aparılan siyasət dünyada başqa dövlətlərin bu sahədə aparılan siyasətlərindən nə ilə fərqlənir?
Məsələyə münasibət bildirən iqtisad elmləri doktoru Fikrət Yusifovun sözlərinə görə, ümumilikdə, Azərbaycanda sosial sferada aparılan siyasət yüksək səviyyədədir: “Sosial sferada yürüdülən siyasət ön sırada durur. Bununla bağlı Azərbaycanda aparılan siyasət başqa dövlətlərdən üstün olması ilə fərqlənir. Xüsusilə postsovet ölkələri ilə müqayisə olunmayacaq dərəcədə bizdə bu sahədə vəziyyət yüksəkdir. Məsələ ondadır ki, həmin ölkələrdən fərqli olaraq, Azərbaycanda bu sahəyə göstərilən diqqət məxsusidir. Son illər ərzində əhalinin aztəminatlı təbəqəsinin sosial müdafiəsini gücləndirmək üçün bir sıra işlər görülüb. Onların maddi və məişət vəziyyətini yaxşılaşdırmaq üçün bir sıra proqramlar, layihələr həyata keçirilir. Belə ki, sözügedən vətəndaşlara sosial müavinət, birdəfəlik yardımlar verilir. Onların məşğulluğunu təmin etmək üçün proqramlar həyata keçirilir. Belə insanların mənzil şəraiti yaxşılaşdırılır. Bir sözlə, onların maddi vəziyyətinin yaxşılaşdırılması üçün saysız-hesabsız addımlar atılır. Bununla bağlı atılan addımlar, həyata keçirilən işlər yaxın qonşu ölkələrdə yoxdur. Sevindirici hal həm də ondan ibarətdir ki, bununla bağlı göstərilən xidmətlər təkmilləşdirilir və dövrün tələblərinə uyğunlaşdırılır. Növbəti ilin büdcəsində də bununla bağlı vəsait nəzərdə tutulub. Həmçinin, aparılan islahatlar çərçivəsində əlavə vəsaitlərin ayrılması nəzərdə tutulub. Hesab edirəm ki, bundan sonrakı illərdə də sözügedən məsələ diqqət mərkəzində olacaq. Bununla yanaşı, təhsil və səhiyyə sektoru da sosial sferanın ayrılmaz hissəsidir. Son illər təhsil və səhiyyə infrastrukturu dövlət vəsaiti hesabına yenilənib. Belə ki, ölkədə köhnə məktəblər, xəstəxanalar əsaslı şəkidə yenidən qurulub. Eyni zamanda, çoxsaylı yeni məktəb və tibb müəssisələri tikilib. Bütün bunlar Azərbaycanda sosial sahəyə necə böyük diqqət göstərildiyini ortaya qoyur”.
Vidadi ORDAHALLI
