Fikrət Yusifov: “Bura şəhid ailələri, müharibə əlilləri, hərbçilər, məcburi köçkünlər, KİV nümayəndələri və digər bu kimi statusa malik olan vətəndaşlar daxildirlər”
Azərbaycan dövlətinin sosial siyasətinin fəlsəfəsi iqtisadi inkişafın nəticələrini əhalinin rifah halını yüksəltməyə yönəltməkdir. Bu prinsip hər gün daha geniş şəkildə davam etdirilir. Ölkədə sosial layihələr və iqtisadi islahatlar dinamik şəkildə həyata keçirilir. Aztəminatlı təbəqə dövlət tərəfindən sosial müdafiəyə cəlb olunub.
Nəticədə ölkəmizin inkişafyönümlü iqtisadi siyasəti sosial sahənin də yüksəlməsinə, vətəndaşların rifah halının yaxşılaşmasına gətirib çıxarıb. Azərbaycan dövlətinin həyata keçirdiyi sosial siyasətin mərkəzində Azərbaycan vətəndaşının firavan yaşam tərzi dayanır. Xüsusən sosial məsələlərin həlli ilə bağlı ölkədə çoxsaylı dövlət proqramları, böyük layihələr icra olunub. Regionların sosial-iqtisadi inkişafına dair üç Dövlət Proqramı, həmin sənədlərə çoxsaylı əlavələr qəbul olunub və icrası təmin edilib.
Sosial siyasətin ən önəmli istiqaməti olan müharibə iştirakçılarının, şəhid ailələrinin, əlillərin, hərbçilərin, alimlərin, KİV işçilərinin sosial təminatının yüksəldilməsi, mənzil-məişət problemlərinin həlli ilə bağlı çoxsaylı tədbirlər həyata keçirilib. Yəni təkcə KİV işçilərinə dövlət hesabına pulsuz mənzillər verilmir. Şəhid ailələrinə, hərbçilərə, əlillərə, alimlərə, mədəniyyət sahəsində xidmətləri olanlara dövlət vəsaiti hesabına pulsuz mənzil verilir. Ümumiyyətlə, bu gün qarşıya qoyulan əsas hədəflərdən biri də 2025-ci ilədək evsizlərin sayını minimuma endirməkdir. Bütün bunlar bir daha təsdiq edir ki, Azərbaycan dövləti daim öz vətəndaşına qayğı ilə yanaşır. Əhalinin rifahının yüksəldilməsini, sosial problemlərinin həllini prioritet vəzifə kimi görür və bu istiqamətdə məqsədyönlü siyasət həyata keçirir.
Bütün bunların fonunda, bir sıra kateqoriyadan olan vətəndaşlara dövlət tərəfindən pulsuz mənzillərin verilməsini və bununla bağlı son 10 ilin nəticələrini ekspertlər necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifovun sözlərinə görə, dövlətin bu yöndə apardığı uğurlu sosial siyasət nəticəsində minlərlə ehtiyacı olan şəxs pulsuz mənzillə təmin olunub: “Mənzilə ehtiyacı olan aztəminatlı və digər bu kimi təbəqədən olan vətəndaşların evlə təmin olunması çox müsbət haldır. Onların mənzil-məişət şəraitinin yaxşılaşdırılması istiqamətində dövlətin atdığı addımlar müsbət xarakterlidir. Eyni zamanda, bu, çox səxavətli və dəyərli bir addımdır. Son 10 il ərzində bir sıra kateqoriyalardan olan minlərlə ölkə vətəndaşı dövlət hesabına pulsuz mənzillə təmin olunub. Bura şəhid ailələri, müharibə əlilləri, hərbçilər, məcburi köçkünlər, KİV nümayəndələri və digər bu kimi statusa malik olan vətəndaşlar daxildirlər. Belə analoqlarla dünyanın çox az yerində rastlaşmaq mümkündür. Azərbaycan hökuməti vətəndaşların sosial maraqlarını qoruyaraq, bir sıra vətəndaşların pulsuz mənzillərlə təmin olunmasına xüsusi önəm verir. Bu, dövlətimizin ölkə vətəndaşlarına göstərdiyi diqqətin göstəricisidir. Dövlət bununla cəmiyyətə çağırış edir ki, Vətən uğrunda vuruşan, çalışan şəxslər hər zaman diqqət mərkəzində olacaq. Bununla bağlı əməyi olan insanlara xüsusi diqqət və qayğı göstəriləcək. Bütün bunlar həm də psixoloji baxımdan cəmiyyətdə çox yaxşı qarşılanır. Dövlət öz ölkəsinin azadlığı, torpaqlarının bütövlüyü uğrunda həyatını təhlükəyə atmış şəhidlərin ailələrinə, əlil insanlara bax bu cür qayğı göstərir. Bu həm də mənəvi-psixoloji cəhətdən çox yaxşı cəhətdir. Eyni zamanda, bu, gələcək nəsillərin tərbiyələndirilməsində, yetişdirilməsində və dövlətə bağlılığın güclənməsində mühüm rol oynayır. Hesab edirəm ki, bütün bunlar çox böyük əhəmiyyət kəsb edir. O cümlədən, elm adamlarına da bu cür qayğının göstərilməsinin əhəmiyyəti böyükdür. Bütün bu işlərin həyata keçirilməsində Prezident İlham Əliyevin xidmətləri böyükdür”.
Vidadi ORDAHALLI
