Fikrət Yusifov: “Əməkhaqqı və ya pensiya məbləği artırsa, insanlar məişət problemlərini lazımi səviyyədə həll edə bilirlər”
Bu gün Azərbaycanın son 15 ildə qazandığı iqtisadi-sosial uğurlardan bütün dünya danışır. Respublikada iqtisadi sahədə əldə olunmuş nailiyyətlər beynəlxalq strukturlar tərəfindən də layiqincə qiymətləndirilib. Belə ki, Davos Ümumdünya İqtisadi Forumu Azərbaycan iqtisadiyyatını rəqabətqabiliyyətliliyinə görə 35-ci yerə yüksəldib. Dünya Bankının “Doing Business-2019” hesabatında Azərbaycan hesabat indikatorları üzrə göstəricilərini ən çox yaxşılaşdıran dünyanın 10 ölkəsindən biri olub.
Qeyd edək ki, ötən illər ərzində ölkənin bir sıra sahələrində iqtisadi inkişaf qeydə alınıb. Təbii ki, iqtisadi inkişaf olan yerdə əməkhaqqı və təqaüdlərin həcmi də artacaq. Sosial ədalət prinsipinə sadiqliyin göstəricisi olaraq əməkhaqqı və pensiya islahatları davamlı proses kimi diqqətdə saxlanır. Açıqlanan statistik rəqəmlərə əsasən, son 15 ildə maaşlar təxminən 7 dəfə, pensiyalar 10 dəfədən çox artıb.
Bu müddət ərzində nominal ifadədə əhalinin gəlirləri 8,6 dəfə artıb, 2 milyona yaxın yeni iş yeri açılıb, yoxsulluğun səviyyəsi 5,4 faizə, işsizliyin səviyyəsi isə 5 faizə enib. Qarşıdakı illərdə maaş və pensiya məbləğlərinin daha da artacağı gözlənir.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, Azərbaycan iqtisadiyyatı inkişaf dövrünü yaşayır. İqtisadi inkişaf qeydə alınan ölkədə əhalinin sosial rifah halı da buna parelel şəkildə uyğunlaşır. Bu səbəbdən də son 15 il ərzində əməkhaqqı və pensiya məbləğinin artması adi halı kimi qəbul olunmalıdır.
İqtisadçının sözlərinə görə, hər il büdcədən maliyyələşən təşkilatların, o cümlədən həmin təşkilatlarda çalışanların əməkhaqqı artılır. Eyni zamanda, təqaüdlərin artırılması ilə bağlı müvafiq qanunlar qəbul olunur.
F.Yusifov qeyd etdi ki, ötən 15 il ərzində büdcədən maliyyələşən təşkilatlar arasında ayrıseçkilik yaşanmayıb. Büdcədən maliyyələşən bütün təşkilatlarda zamanla əməkhaqqının məbləği artıb: “Büdcə təşkilatlarında artım hər kəs üçün eyni səviyyədə aparılıb. Sahədən asılı olaraq, hər il əməkhaqqı 10-15 faiz artaraq bu səviyyəyə çatıb”.
Ekspert onu da vurğuladı ki, qonşu ölkələrlə müqayisədə Azərbaycanda maaş və təqaüdlərin artırılması daha yüksəkdir.
İqtisadçı hesab edir ki, qarşıdakı illərdə iqtisadiyyatın artımı daha yüksək olacaq. Artım daha çox qeyri-neft sektorunda özünü büruzə verəcək. Təbii ki, bu, əməkhaqqı və təqaüd məbləğinin artırılmasına da təsir edəcək.
Həmsöhbətimiz onu da əlavə etdi ki, əməkhaqqı və təqaüdlərin artırılması əhalinin sosial vəziyyətinin yaxşılaşdırılmasına müsbət təsir edir. Əməkhaqqının artımı insanların sosial həyatının yaxşılaşmasına aparan ən qısa yoldur: “Əməkhaqqı və ya pensiya məbləği artırsa, insanlar məişət problemlərini lazımi səviyyədə həll edə bilirlər. Nəzərə almaq lazımdır ki, əhalinin sosial vəziyyətinin yaxşılaşdırılması istiqamətində əməkhaqqının artırılmasına hər il büdcədə xüsusi önəm verilir. Bundan başqa, müəssisə və təşkilatlar da müvafiq qaydada öş işçilərinin əməkhaqqını artırıblar”.
Günel CƏLİLOVA
