Aydın Hüseynov: “Yaxın bir neçə ay ərzində Ermənistanda kəskin iqtisadi böhran yaşanacaq və bu böhran uzunmüddətli olacaq”
Asiya İnkişaf Bankı Azərbaycanda iqtisadi göstəricilərin yaxşılaşması ilə əlaqədar Mərkəzi Asiya üzrə proqnozu artırıb. Asiya İnkişaf Bankı Azərbaycanda dövlət investisiyalarının və “Şahdəniz” qaz-kondensat yatağında hasilatın artması ilə əlaqədar 2019-cu il üçün Mərkəzi Asiyanın ümumdaxili məhsulu üzrə proqnozu 4,2 faizdən 4,3 faizədək artırıb. Bu barədə bankın “Asian Development Outlook-2018” hesabatına yenilənmiş əlavəsinə istinadən bildirir.
Eyni zamanda bank Azərbaycanda inflyasiya proqnozlarının yaxşılaşması ilə əlaqədar 2018-ci il üzrə Mərkəzi Asiya regionunda inflyasiya proqnozunu 8,4 faizdən 8 faizədək azaldıb.
Digər ölkələrə gəldikdə isə, AİB Ermənistanda həm 2018-ci, həm də 2019-cu il üçün inflyasiya üzrə proqnozları artırıb. Qeyd olunur ki, 2018-ci ilin ilk 10 ayında ölkədə inflyasiya əvvəlki illə müqayisədə daha yüksək olub. Bundan başqa, Ermənistanda aksiz və gömrük rüsumlarının artımı gözlənir.
Qeyd edək ki, son zamanlar tək Asiya İnkişaf Bankı deyil, digər beynəlxalq maliyyə institutları da Azərbaycan iqtisadiyyatının inkişafı haqqında proqnozlar verirlər. Həmçinin, beynəlxalq maliyyə təşkilatları Ermənistan iqtisadiyyatının vəziyyətinin pisləşməsi barədə məlumatlar yayırlar.
Millət vəkili Aydın Hüseynov “Bakı-Xəbər”ə açıqlamasında qeyd etdi ki, Ermənistanda iqtisadi vəziyyət daha kəskin olacaq: “Məlumdur ki, Ermənistan daxili büdcəsini öz resursları hesabına formalaşdırmır. İanələr, xarici diasporların yardımı və bəzi təşkilatlardan əldə olunan gəlir hesabına formalaşır. Əhali işləməyə maraq göstərmir. Həmçinin, Ermənistanda siyasi proseslər daha da kəskinləşir. Ətraf qonşularla münasibəti yox səviyyəsindədir. Azərbaycanla müharibə şəraitindədir. MDB ölkələri ilə Ermənistanın münasibəti xoş deyil. Bu kimi hadisələr göstərir ki, yaxın bir neçə ay ərzində Ermənistanda kəskin iqtisadi böhran yaşanacaq. Həmin böhran uzunmüddətli olacaq
Ermənistanda siyasi vəziyyət daha da kritikləşir. Bəllidir ki, “Respublika” partiyası Ermənistanda mitinqə başlayıb. Əhalinin yarıdan çoxunun seçkidə iştirak etməməsi qeyd olunan ölkənin iqtisadiyyatına inamın olmaması ilə bağlıdır”.
Millət vəkili Ermənistandan fərqli olaraq, Azərbaycan iqtisadiyyatının inkişaf etdiyini dilə gətirdi. Azərbaycanda dinamik inkişaf yaşanır. Ölkə iqtisadiyyatının inkişafı haqqında tanınmış beynəlxalq qurumlar məlumatlar yayırlar: “Danılmaz faktdır ki, Azərbaycan iqtisadiyyatı inkişaf dövrünü yaşayır. Valyuta ehtiyatlarımızın həcmi artır. Manat möhkəmlənir, xarici ticarət dövriyyəmiz müsbətə doğru dəyişir, investisiya yatırmaq istəyən ölkələrin sayı artır. Bu kimi amillər göstərir ki, qarşıdakı illərdə Azərbaycanda iqtisadi artım 4-4,5 faiz arasında olacaq”.
Günel CƏLİLOVA
