Ramil Osmanlı: “… lisenziyadan kənar olması imkan yaradır ki, bu sahədə heç bir təcrübəsi olmayan istənilən şəxs…”
Azərbaycanda qiymətləndiricilərin dövlət tərəfindən tənzimlənməsinin tətbiq olunması təklif olunur. Qiymətləndiricilərin dövlət tənzimlənməsinə ciddi ehtiyac olduğu bildirilir. Belə bir təkliflə “Koneko Group” qiymətləndirmə şirkətinin direktoru, Azərbaycanın Qiymətləndiricilər Cəmiyyətinin sədr müavini Vüqar Oruc çıxış edib.
O, media nümayəndələrinə açıqlamasında bildirib ki, təcrübəsiz qiymətləndirmə şirkətləri ölkənin bank sisteminə ziyan vurduğu üçün, qanunvericilikdə tənzimlənməyə ciddi ehtiyac yaranıb: “Banklar və vətəndaşlar tərəfindən qiymətləndirmə şirkətinin yanlış seçimi problemli kreditlərin yaranmasında böyük rol oynayıb. Bu sahədə peşəkar yanaşmanın təmin olunmasına çalışırıq”.
V.Oruv onu da qeyd edib ki, bu sahədə müvafiq sertifikatı olmalarına baxmayaraq, heç bir təcrübəyə malik olmayan şirkətlər müştəriləri bazarlara cəlb etməyə çalışırlar. Yaranmış problemin həll olunması üçün dövlət dəstəyinə böyük ehtiyac var.
Ekspertlərin fikrincə, qiymətləndiricilər dövlət tərəfindən tənzimlənməlidirlər.
Daşınmaz əmlak məsələləri üzrə ekspert Ramil Osmanlı “Bakı-Xəbər”ə açıqlamasında qeyd etdi ki, qiymətləndiricilərin dövlət tərəfindən tənzimlənməsi vacib məsələdir: “Bu gün Azərbaycanda qiymətləndirmənin dövlət tərəfindən tənzimlənməsinə böyük ehtiyac var. Bu, ilk növbədə, qanunvericiliyin təkmilləşməsi baxımından zəruridir. Azərbaycanda “Qiymətləndirmə fəaliyyəti haqqında” Qanun yeni redaksiyada işlənməli, dəyişikliklər əlavə olunmalıdır. Xatırladım ki, sözügedən qanun 1998-ci ildə qəbul olunub. Bu müddət ərzində qanuna 1 cümləlik dəyişiklik olunub”.
Həmsöhbətimiz hesab edir ki, qiymətləndirici fəaliyyətinin tənzimlənməməsi, lisenziyadan kənar olması imkan yaradır ki, bu sahədə heç bir təcrübəsi olmayan istənilən şəxs qeydiyyatdan keçməklə bu işlə məşğul olsun. Bu da kifayət qədər ciddi problemlərin yaranmasına səbəb olur. Qiymətləndirmə məsələsi ilə bağlı münasibətdə çox ciddi problem baş verir. Yaşanan problemlərin həll olunması üçün qiymətləndirmənin dövlət tərəfindən tənzimlənməsi məqsədəuyğundur.
Günel CƏLİLOVA
