“Çində bunu nümayiş etdirməklə, bir daha öz geosiyasi əhəmiyyətini ortaya qoydu”
Azərbaycanın tranzit imkanları Çində keçirilən sammitdə təqdim olunub.
Belə ki, İqtisadiyyat Nazirliyinin mətbuat xidmətindən verilən məlumata görə, Çin Xalq Respublikasının Hunan vilayətinin Candziadzie şəhərində Çinin Beynəlxalq Ticarət Palatası və İpək Yolu Beynəlxalq Ticarət Palatasının təşkilatçılığı ilə "Bir Kəmər - Bir Yol" təşəbbüsünün 5 illiyi münasibətilə sammit keçirilib.
Azərbaycan Tranzit Yükdaşımalar üzrə Koordinasiya Şurasının ofis rəhbəri Rüfət Bayramov "Bir Kəmər - Bir Yol" təşəbbüsü çərçivəsində beynəlxalq əlaqələrin inkişafı ilə bağlı dövlət qurumlarının rolu üzrə panel müzakirələrdə çıxış edib. O, sammit iştirakçılarına Azərbaycandan keçən nəqliyyat dəhlizləri, ölkəmizin tranzit imkanları, infrastrukturun inkişafı ilə bağlı görülən işlər, reallaşdırılan layihələr barədə məlumat verib.
O da məlumdur ki, Azərbaycanın regionda tranzit imkanları ged-gedə artır. Avropa ilə Asiyanın qovşağında yerləşən Azərbaycanın nəqliyyat dəhlizi kimi önəmi artmaqdadır. Ölkəmizin iştirakçısı və təşəbbüsçüsü olduğu enerji və nəqliyyat layihələrinin uğurlu icrası, yeni-yeni layihələrin gündəmə gətirilməsi bu önəmi daha da diqqətçəkən edir. Əhəmiyyətinə görə neft-qaz layihələrindən geri qalmayan, Azərbaycanın tranzit ölkə kimi mövqeyini daha da möhkəmləndirən Bakı-Tiflis-Qars dəmir yolu xəttinin də istifadəyə verilməsi təkcə Azərbaycan və region dövlətləri üçün deyil, qlobal əhəmiyyətlidir. Digər tərəfdən, Xəzər sahilində Ələt Beynəlxalq Ticarət Limanının tikintisi ölkəmizin tranzit və logistik imkanlarını genişləndirir. Şimal-Cənub nəqliyyat marşrutu da Azərbaycan üçün xüsusi əhəmiyyət daşıyır. Bu dəhlizin fəaliyyətə başlaması Asiyadan Avropanın şimalınadək geniş bir ərazidə yükdaşımaların həcmini artırır. Hazırda bu marşrut üzrə dəmir yolu xəttində yenidənqurma işləri həyata keçirilir. Nəticədə qatarların sürət həddi artacaq, daha çox yük daşınmasına imkan yaranacaq.
Bütün bu deyilənlərin fonunda Azərbaycanın tranzit imkanlarının Çində təqdim olunmasınının strateji əhəmiyyətini ekspertlər necə dəyərləndirir?
Məsələyə münasibət bildirən politoloq Məhəmməd Əsədullazadənin sözlərinə görə, Azərbaycanın tranzit imkanlarının təqdim edilməsi ölkəmizin dünya miqyasında nüfuzunun artmasına səbəb olacaq: “Qeyd edim ki, Azərbaycan İpək yolunun üzərində yerləşir. Çinlə Avropanı birləşdirən nəqliyyat qovşağına malikdir. Bu gün Bakı-Tiflis-Qars dəmir yolu xətti məhz tarixi İpək yolunun bərpasıdır. Çindən məhz yola salınan yüklər Bakı-Tiflis-Qars dmir yolu vasitəsilə Avropaya çatdırıldı. Bu onu göstərir ki, Azərbaycanın tranzit nəqliyyat imkanları genişlənir, Çinin bir yol və bir qurşaq planına töhfə verir. Azərbaycan bu gün öz nəqliyyat və tranzit imkanları ilə iki qitəni birləşdirən imkanlara sahibdir. Çində bunu nümayiş etdirməklə, bir daha öz geosiyasi əhəmiyyətini ortaya qoydu. Ölkəmizin bu imkanları gələcək perspektivdə daha da qlobal əhəmiyyət kəsb edəcək və əlavə valyutanın daxil olmasına gətirib çıxaracaq. Hesab edirəm ki, Çində bu sərgidə iştirak digər ölkələrin diqqətini cəlb edəcək və onların Azərbaycana marağını artıracaq. Hesab edirəm ki, Azərbaycan bundan sonra öz tranzit imkanları ilə Avrasiyanın nəqliyyat infrasturukunun müsbətə doğru dəyişməsinə səbəb olacaq”.
Vidadi ORDAHALLI
