Əli Əlirzayev: “Bütün bunlar göstərir ki, ölkəmizdə son illər aparılan islahatlar artıq öz nəticəsini verməkdədir”
Milli iqtisadiyyatın əsas inkişaf istiqamətlərini müəyyənləşdirən müstəqil Azərbaycan dünya düzənində özünəməxsus mövqeyini daim möhkəmləndirir. Son 15 ildə Prezident İlham Əliyevin həyata keçirdiyi tam müstəqil siyasət nəticəsində Azərbaycanda yeni keyfiyyətli inkişaf modeli formalaşıb. Bu yeni inkişaf modeli strateji hədəflərinə, əhatə dairəsinə, məzmununa və konkret reallaşma mexanizminə görə bitkindir. Bütün bu uğurları şərtləndirən isə əlbəttə ki, iqtisadi müstəqillikdir. Bu iqtisadi müstəqillik Azərbaycana həqiqətən böyük dividendlər qazandırıb.
Ötən il dünyanın aparıcı beynəlxalq təşkilatları, qurumları və tanınmış siyasətçilər, iqtisadçılar Azərbaycanın reallaşdırdığı hərtərəfli islahatları inkişaf etməkdə olan ölkələr üçün nümunə kimi göstərdilər. Beynəlxalq reytinq mərkəzləri və nüfuzlu kütləvi informasiya vasitələri ölkəmizin müxtəlif sahələrdəki uğurlarını yüksək qiymətləndirirlər.
Bu günlərdə isə, məlum olduğu kimi, Dünya İqtisadi Forumunun tamamilə yeni metodologiya əsasında ictimaiyyətə təqdim etdiyi Qlobal Rəqabətlilik Hesabatında Azərbaycan müxtəlif indikatorlar üzrə yüksək nəticələr əldə edib. Hesabatda Azərbaycan əhalinin elektriklə təchizatı səviyyəsinə görə maksimal 100 faiz bal almaqla dünyada ilk pilləyə yüksəlib.
Reallıq ondan ibarətdir ki, son illər əhalinin elektrik təchizatı əhəmiyyətli dərəcədə yaxşılaşıb. Bu sahə ilə bağlı infrastruktur tamamilə yenilənib. Ona görə də bununla bağlı beynəlxalq göstəricilər yüksək dəyərləndirilir.
Sözügedən məsələni dəyərləndirən iqtisadçı-alim Əli Əlirzayevin fikrincə, bu il Qlobal Rəqabətlilik Hesabatı tamamilə yeni metodologiya əsasında ictimaiyyətə təqdim olunsa da, Azərbaycanın mövqeyi bəzi indikatorlar üzrə daha da yaxşılaşıb: “Dünya İqtisadi Forumunun hazırladığı hesabatlar, eləcə də hesabatlar çərçivəsində tərtib edilən reytinq siyahısı həmişə dünyanın siyasət, iqtisadiyyat və biznes dairələrində böyük maraqla qarşılanır. Bu baxımdan istənilən bir ölkənin belə bir reytinq siyahısında mövqelərini yaxşılaşdırması həmin ölkə haqqında dünyanın qeyd edilən dairələrində müsbət rəyin formalaşmasına, qlobal maliyyə və biznes subyektlərinin, o cümlədən də qlobal investorların həmin ölkə iqtisadiyyatına diqqətinin artmasına kömək edir. Təbii ki, bu qurumun hesabatlarında Azərbaycanın da mövqeyini ilbəil möhkəmləndirməsi müsbət haldır. Məsələn, infrastruktur, təhsil və bacarıqlar və biznesin dinamikliyi kimi üç indikator üzrə Azərbaycan yeni hesabatda mövqelərini əhəmiyyətli dərəcədə yaxşılaşdırıb. Eyni zamanda, Azərbaycan Qlobal Rəqabətlilik Hesabatında dünyada sosial bərabərliyin ən yüksək səviyyədə təmin olunduğu ölkə kimi vurğulanıb. Azərbaycan əhalinin elektriklə təchizatı səviyyəsinə görə maksimal 100 faiz bal almaqla dünyada ilk pilləyə yüksəlib. Bütün bunlar göstərir ki, ölkəmizdə son illər aparılan islahatlar artıq öz nəticəsini verməkdədir. Ölkədə bir sıra elektrik stansiyaları tikilib. Azərbaycan hətta digər ölkələrə elektrik enerjisi ixrac edir”.
Vidadi ORDAHALLI
