Əkbər Qoşalı: “Bu və bənzər hesabatlarda ölkəmizin inkişafı daha yüksək qiymət alacaq”
Xəbər verildiyi kimi, Dünya İqtisadi Forumunun Qlobal Rəqabətlilik Hesabatı tamamilə yeni metodologiya əsasında ictimaiyyətə təqdim edilib. Qlobal trendlər nəzərə alınmaqla, hesabatın metodologiyasında dəyişikliklər o qədər dərin və əhatəli olub ki, Dünya İqtisadi Forumu bu metodologiyanı yeni nəsil "4.0" kimi təqdim edib.
Bu isə onu deməyə əsas verir ki, "Qlobal Rəqabətlilik Hesabatı-2018/2019" yeni dövrün ilk hesabatıdır. Belə ki, əvvəlki illərdən fərqli olaraq, hesabatın metodologiyası ciddi şəkildə dəyişdirilərək hesabata yeni indikatorlar daxil edilib. Ümumilikdə, əvvəlki hesabatın 114 indikatorundan 84-ü (74 faizi) çıxarılıb, 68 yeni indikator isə daxil edilib. Beləliklə, hesabatda mövcud 98 indikatorun 70 faizi tamamilə yenidir.
Azərbaycan Qlobal Rəqabətlilik Hesabatının yeni metodologiyası əsasında ilk dəfə qiymətləndirilib. Ölkəmiz ilk hesabatda Türkiyə, Serbiya, Gürcüstan, Cənubi Afrika Respublikası və Xorvatiya ilə birlikdə 7-ci onluğa daxil olmaqla 69-cu yerdə qərarlaşıb. Hesabatın 12 əsas sütun indikatorundan 7-si üzrə ölkəmizin mövqeləri əhəmiyyətli dərəcədə yaxşılaşıb. Belə ki, hesabatın institutlar, infrastruktur, İKT-nin istifadə səviyyəsi, səhiyyə, əmək bazarı, biznes dinamikliyi və innovasiya potensialı sütun indikatorları üzrə Azərbaycanın mövqelərinin yaxşılaşması Qlobal Rəqabətlilik Hesabatı tərəfindən qeydə alınıb.
Bütün bunların fonunda, Azərbaycanın Qlobal Rəqabətlilik hesabatında 69-cu yer tutması necə göstəricidir?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə heyətinin üzvü Əkbər Qoşalının sözlərinə görə, bu yaxşı göstəricidir: “Biz bu il türk-müsəlman Şərqində ilk olan cümhuriyyətin 100 illiyini, həm də “Dövlət müstəqilliyi haqqında” Konstitusiya Aktı qəbul edilməsinin 27-ci ildönümünü qeyd edirik. Ölkəmiz, xalqımız üçün belə önəmli məqamda Qlobal Rəqabətlilik Hesabatında respublikamızın mövqelərinin 12 əsas hesabat sütunu indikatorundan yeddisi üzrə önəmli dərəcədə yaxşılaşmasını görmək, əlbəttə, qürurvericidir. Prezident İlham Əliyevin başçılığı ilə müstəqil respublikamızda həyata keçirilən siyasətin nəticəsi olaraq, Azərbaycan dünya birliyinin özünəməxsus mövqeyə sahib hörmətli üzvünə çevrilib. Dünya İqtisadi Forumunun bu günlərdə açıqlanan məlum hesabatı deyilənlər baxımından səciyyəvidir. Özü də Forumun budəfəki hesabatı yeni metodologiya ilə hazırlanıb. Metodologiyası ciddi şəkildə dəyişdirilən hesabata yeni indikatorlar daxildir.
Bizim respublika, qardaş Türkiyə və qonşu Gürcüstanın da daxil olduğu 7-ci onluqda yer alaraq, 69-cu yerdə qərar tutub. Bir daha vurğulayaq ki, bütövlükdə, QRH 114 indikatordan 84-nün çıxarılması, üstəlik, 68 yeni indikatorun daxil edilməsi ilə yeni məzmun qazanıb. İnstitutlar, infrastruktur, İKT-nin istifadə səviyyəsi, səhiyyə, əmək bazarı, biznes dinamikliyi və innovasiya potensialı indikatorları üzrə respublikamızın hesabatdakı mövqelərinin yaxşılaşması qeydə alınıb. Üstəlik, respublikamız bəzi indikatorlar üzrə, məsələn, ətraf mühitə təsir və inklüziv inkişaf üzrə hesabatda öz öncül mövqeyini saxlayıb, bəzi göstəricələrlə isə ilk pillədə yer alıb. Bütövlükdə, sözügedən hesabat Azərbaycan Prezidentinin başçılığı ilə yürüdülən iqtisadi islahatlar nəticəsində gerçəkliyə çevrilən faktları bir daha yada salır. Biz Azərbaycanın mövqeyinin gələcəkdə daha da yaxşılaşacağına inanırıq. Buna infrastruktur, siyasi iradə, dövlət başçısına xalqın inamı və digər səbəblər əsas verir. Ərazi bütövlüyümüzü bərpa edib, bütün ölkə üzrə suverenliyimizi təmin etdikdən sonra bu və bənzər hesabatlarda Azərbaycanın inkişafı daha yüksək qiymət alacaq”.
Vidadi ORDAHALLI
