Müslüm İbrahimov: “Ölkəmizə investisiya qoyuluşunun artmasının səbəbi Azərbaycanın dünyada stabil ölkə kimi tanınmasıdır”
Ölkədə əlverişli biznes mühitinin yaradılması, daxili və xarici investorların fəaliyyətinə geniş imkanların açılması, sərmayədarların hüquqlarının etibarlı şəkildə qorunması, bunun hesabına qeyri-neft sektorunun inkişafı dövlətimizin həyata keçirdiyi iqtisadi siyasətin prioritet istiqamətini təşkil edir. Ümumiyyətlə, müasir dövrdə ölkələrin reytinqini və etibarlılığını göstərən əsas amillərdən biri də iqtisadiyyata qoyulan xarici investisiyalardır.
Qlobal iqtisadi böhran şəraitində belə Azərbaycan, əksər xarici dövlətlərdən fərqli olaraq, investisiya yatırılması baxımından dünyanın cəlbedici ölkələrindən birinə çevrilib.
Məlumdur ki, ölkədə yerli və xarici investorların fəaliyyət göstərmələri üçün geniş imkanlar yaradılıb. Mövcud qanunvericilik çərçivəsində investorların sərmayələri lazımi səviyyədə qorunur. Vergi və gömrük qanunvericiliyi sahəsində etibarlı hüquqi bazanın yaradılması da xarici investorların ölkəmizə cəlb olunması baxımından əhəmiyyətli rol oynayır. Ölkənin enerji sektoru ilə yanaşı, digər sahələr də xarici investorlar üçün cəlbedici olaraq qalır.
Potensial investorlar isə Azərbaycanda maliyyə, inşaat, kənd təsərrüfatı, alternativ enerji, turizm, informasiya texnologiyaları, qida və s. sektorlara böyük maraq göstərirlər.
Xarici ölkələr və beynəlxalq təşkilatlar tərəfindən əsas kapitala yönəldilmiş xarici investisiyanın çox hissəsi Böyük Britaniya, ABŞ, Yaponiya, Fransa, Norveç, Çexiya, Türkiyə, Koreya və digər ölkələrə məxsusdur.
Açıqlanan statistik rəqəmlərə əsasən, son 15 ildə Azərbaycan iqtisadiyyatına 250 milyard dollar sərmayə yatırılıb. Azərbaycan Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev media nümayəndələrinə açıqlamasında deyib ki, yatırılan bu sərmayənin yarısı xarici investisiyaların payına düşür.
Son 15 ildə Azərbaycan iqtisadiyyatına yatırılan sərmayələr haqqında iqtisad elmlər doktoru Müslüm İbrahimovla söhbət etdik. O, "Bakı-Xəbər"ə açıqlamasında qeyd etdi ki, Azərbaycan dövləti üçün prioritet sayılan sahələrə investisiya yatırılmaqda davam edir. Ölkənin əsas iqtisadi strategiyası qeyri-neft sektorunu inkişaf etdirməkdir: “İlk olaraq bildirim ki, qeyri-neft sektorunun müxtəlif sahələrinə sərmayə qoyulur. İnfrastrukturun yaxşılaşdırılması, aqrar sahənin inkişafı, turizmin dirçəlməsi və digər sahələrə sərmayə yatırılır.
Son illər nəqliyyat sahəsinə də sərmayə yatırılır. Yeni yollar çəkilərək istifadəyə verilir. Həm avtomobil, həm də dəmir yolları çəkilir. Eyni zamanda, dəniz limanının dünya standartlarına çatdırılması üçün investisiya qoyulur”.
İqtisadçının sözlərinə görə, son illər ölkə iqtisadiyyatına qoyulan sərmayə yeni iş yerlərinin açılmasına səbəb olub. Yeni iş yerlərinin açılması rəqabət qabiliyyətinin artmasına səbəb olur”.
Həmsöhbətimiz onu da vurğuladı ki, son 15 ildə neft sektoruna yatırılan investisiyaların həcmi artıb. Artım əsasən TANAP və TAP layihəsi ilə bağlıdır: “Bu layihələr gələcəkdə Azərbaycan iqtisadiyyatına daha da uğurlu dividendlər gətirəcək. Ona görə də neft sektoruna yatırılan investisiyaların həcmi artıb. Ümumiyyətlə, ölkəyə yatırılan investisiyaların həcminin artması xoş haldır. Hazırda Azərbaycana investisiyalar vacibdir. Təbii ki, investisiyalar hər bir ölkənin maliyyə və iqtisadi baxımdan yüksəlməsində rol oynayır”.
M.İbrahimov bildirdi ki, ölkəmizə investisiya qoyuluşunun artmasının səbəbi Azərbaycanın dünyada stabil ölkə kimi tanınmasıdır: “Bunun əsas səbəbi odur ki, Azərbaycan stabil dövlətdir. Çünki investorlar üçün əsas şərtlərdən biri stabillikdir. O dövlət ki, stabildir, daxili problemləri yoxdur, qanun çərçivəsində investorun bütün şərtləri qəbul olunur, qanunlar işləyir, həmin dövlətə investisiya qoyurlar”.
Günel CƏLİLOVA
