Rəşad Həsənli: “Daxili bazarda qızıl satışı ilə bağlı yaşanan passivlik qiymətə də öz təsirini göstərəcək”
Hazırda qızıl bazarında aktivlik müşahidə olunmur. Qızıl dükanlarında alıcı azlığı müşahidə olunur. Bunun da səbəbi qızılın satış qiymətinin bahalaşması ilə bağlıdır.
Məlumatlara görə, Azərbaycanda qızıl və gümüş bahalaşıb. Statistik rəqəmlərə əsasən, qızılın qiyməti son bir neçə gün ərzində 6,5875 manat artaraq 1 unsiya üçün 2084,217 manat təşkil edib. Gümüş 0,0557 manat bahalaşaraq 1 unsiya üçün 24,94 manata bərabər olub.
Qızılın satış qiymətinin qalxması səbəblərini öyrənmək məqsədilə iqtisadçı-ekspert Rəşad Həsənliyə müraciət etdik. O, qəzetimizə açıqlamasında bildirdi ki, qızılın satış qiymətinin yüksəlməsi dünya bazarında baş verən qiymət artımı ilə bağlıdır: “Son bir həftə ərzində dünya bazarında müəyyən qədər gərginlik müşahidə olunmaqdadır. Gərginlik fonunda investorlar daha çox təhlükəsiz aktivlərə yatırım etməyə üstünlük verirlər. Amerika valyutasının müəyyən qədər dəyərsizləşməsi baş verir. Bu fonda qızıl həm qiymətli kağızlardan, aktivlərdən, həm də dollardan kənarlaşan vəsaitlərin üz tutduğu əsas investisiya alətidir. Bu səbəbdən də 5 gün ərzində dünya bazarında qızılın 1 unsiyasının qiyməti 50 dollara qədər bahalaşıb. Qızılın 4 faizə yaxın bahalaşması daxili bazara da təsir göstərir. Ancaq hazırda qızılın satışında passivlik müşahidə olunur. Bunun səbəbi həm toy mövsümünün olmaması və qiymətin yüksək olması ilə bağlıdır”.
Həmsöhbətimizin sözlərinə görə, daxili bazarda qızılın satışı arzuolunan səviyyədə deyil. R.Həsənov hesab edir ki, daxili bazarda qızılın satışı ilə bağlı yaşanan passivlik qiymətə öz təsirini göstərəcək: “Zənnimcə, yaxın günlər ərzində qızılın satış qiyməti əvvəlki vəziyyətinə qayıda bilər. Qızılın qiymətinin yenidən ucuzlaşması ehtimalı yüksəkdir”.
Günel CƏLİLOVA
