Əliməmməd Nuriyev: “Bu da ölkədə aparılan düzgün sosial siyasətin nəticəsidir”
Məlum olduğu kimi, Dünya İqtisadi Forumunun Qlobal Rəqabətlilik Hesabatı tamamilə yeni metodologiya əsasında ictimaiyyətə təqdim edilib. Qlobal trendlər nəzərə alınmaqla, hesabatın metodologiyasında dəyişikliklər o qədər dərin və əhatəli olub ki, Dünya İqtisadi Forumu bu metodologiyanı yeni nəsil “4.0” kimi təqdim edib.
Bu isə onu deməyə əsas verir ki, “Qlobal Rəqabətlilik Hesabatı-2018/2019” yeni dövrün ilk hesabatıdır. Belə ki, əvvəlki illərdən fərqli olaraq, hesabatın metodologiyası ciddi şəkildə dəyişdirilərək hesabata yeni indikatorlar daxil edilib. Ümumilikdə, əvvəlki hesabatın 114 indikatorundan 84-ü (74 faizi) çıxarılıb, 68 yeni indikator isə daxil edilib. Beləliklə, hesabatda mövcud 98 indikatorun 70 faizi tamamilə yenidir.
Azərbaycan Qlobal Rəqabətlilik Hesabatının yeni metodologiyası əsasında ilk dəfə qiymətləndirilib. Ölkəmiz ilk hesabatda Türkiyə, Serbiya, Gürcüstan, Cənubi Afrika Respublikası və Xorvatiya ilə birlikdə 7-ci onluğa daxil olmaqla 69-cu yerdə qərarlaşıb. Hesabatda Azərbaycan bir sıra sahələrlə bağlı mövqelərini əhəmiyyətli dərəcədə yaxşılaşdırıb. Onlardan biri də ölkədə sosial bərabərliyin təmin olunması ilə bağlıdır. Belə ki, Azərbaycan Qlobal Rəqabətlilik Hesabatında dünyada sosial bərabərliyin ən yüksək səviyyədə təmin olunduğu ölkə kimi vurğulanıb.
Görünən odur ki, sözügedən hesabatda Azərbaycanda bu sahədə görülən işlərə çox yüksək qiymət verilib. Maraqlıdır, bəs ekspertlər Azərbaycanda sosial bərabərliyin ən yüksək səviyyədə təmin olunmasını necə şərh edirlər?
Məsələyə münasibət bildirən Konstitusiya Araşdırmaları Fondunun prezidenti Əliməmməd Nuriyev buna bir neçə aspektdən yanaşdı: “Azərbaycanın bu məsələdə əldə etdiyi nailiyyətlərin yüksək qiymətləndirilməsi təsadüfi deyil. Məsələ ondadır ki, Azərbaycanda hər zaman büdcə tərtib olunarkən sosial müdafiə məsələləri ön plana çıxır. Çünki Azərbaycan dövləti sosial siyasət yeridir. Dövlət büdcəsi sosialyönümlü büdcədir. Cənab Prezident tərəfindən aparılan sosial siyasətin nəticələri də sosial bərabərliyin təmin edilməsində mühüm vasitədir. Bu gün ölkədə məşğulluğun həlli ilə bağlı mühüm addımlar atılır. İşsizliyin minimuma endirilməsi ilə bağlı çox böyük layihələr həyata keçirilib. Belə ki, 1 milyon nəfərdən çox ölkə vətəndaşı işlə təmin olunub. Bütün bunlar beynəlxalq təşkilatların diqqətindən yayınmır. Sosial bərabərliyin təmin edilməsi ilə bağlı həyata keçirilən işlərdən biri də ünvanlı sosial yardımın verilməsi ilə bağlıdır. Nəzərə almaq lazımdır ki, ünvanlı sosial yardımın verilməsi mexanizminin daha da təkmilləşdirilməsi sosial bərabərliyin daha da yaxşılaşmasına öz töhfəsini verir. Azərbaycanda yoxsulluğun aradan qaldırılması ilə bağlı çoxsaylı dövlət proqramları qəbul olunub. Nəticədə ölkədə yoxsulluq səviyyəsi 60 faizdən 5 faizə gəlib düşüb. Bu da sosial bərabərliyə istiqamətlənən addımların göstəricisidir. Azərbaycanda ilbəil orta aylıq əməkhaqqı artır. Eyni zamanda, pensiyaların artması istiqamətində mühüm addımlar atılmaqdadır. Deməyim odur ki, bu istiqamətdə görülən bütün işlər ölkədə sosial bərabərliyin təmin olunmasına xidmət edir. Bu da ölkədə aparılan düzgün sosial siyasətin nəticəsidir”.
Vidadi ORDAHALLI
