İlqar Hüseynli: “Su təchizatının yüksək səviyyədə qurulması istiqamətində görülən işlər əhəmiyyətli məsələdir”
“Qarşıya məqsəd qoyulub ki, Azərbaycanın bütün şəhərlərində 100 faiz tam standartlara uyğun içməli su layihələri icra edilsin”. Bunu "Astara şəhərinin içməli su təchizatı sistemləri" layihəsinin başa çatması münasibətilə keçirilən mərasimdə iştirak edən Prezident İlham Əliyev rayon ictimaiyyətinin nümayəndələri ilə görüşündə deyib.
Dövlət başçısı qeyd edib ki, Astara şəhər sakinlərinə Dünya Səhiyyə Təşkilatının standartlarına uyğun içməli su verilir: “Növbəti mərhələdə artıq bir çox kəndlərə də suyun verilməsi nəzərdə tutulur. Əlbəttə, növbəti illərdə bu məqsədlə əlavə vəsait ayrılacaq ki, bu problem öz həllini tapsın. İçməli su layihələrinin icrası böyük maliyyə vəsaiti, çox böyük investisiyalar tələb edir. Biz bunu edirik ki, insanlar çox təmiz, keyfiyyətli su ilə təmin olunsunlar. Çünki bir daha demək istəyirəm ki, sağlamlıq üçün, normal həyat tərzi üçün içməli su əsas şərtdir".
Məlumat üçün qeyd edək ki, son 15 ildə əhalinin dünya standartlarına uyğun keyfiyyətli içməli su ilə təmin olunması məqsədilə 27 şəhər və rayon mərkəzində su və kanalizasiya şəbəkəsi yaradılıb, 230 su anbarı tikilib, 300-dən çox artezian və subartezian quyusu qazılıb, modul tipli 466 sutəmizləyici qurğu quraşdırılıb. Bu sahədə Oğuz-Qəbələ-Bakı su kəmərinin və Ceyranbatanda sutəmizləyici qurğunun tikintisi mühüm əhəmiyyət kəsb edir. Görülmüş işlər nəticəsində mərkəzləşdirilmiş qaydada içməli su ilə təmin olunan əhalinin sayı 2 dəfədən çox artıb.
Ümumilikdə, ölkənin bütün şəhərlərində 100 faiz tam standartlara uyğun içməli su təminatının icra olunmasının qarşıya məqsəd qoyulmasını ekspertlər necə dəyərləndirirlər?
Məsələyə münasibət bildirən ekspert İlqar Hüseynli içməli su təminatı ilə bağlı qarşıya qoyulan məqsədə müsbət prizmadan yanaşdı: “Məsələ ondadır ki, əhalinin önəmli ehtiyacı olduğu sahələrdən biri elektrik enerjisi və içməli su təchizatıdır. Bu baxımdan su təchizatının yüksək səviyyədə qurulması istiqamətində görülən işlər əhəmiyyətli məsələdir. Bundan çox-çox illər öncə ölkə vətəndaşları suyu fasilələrlə alırdılar və bu sahədə müəyyən problemlər var idi. Faktiki olaraq, suyun təchizatında müəyyən problemlər yaşanırdı. Ancaq sonrakı dövrlərdə, ümumilikdə, ölkə boyu su layihələrinin işə salınması, vətəndaşların 24 saat fasiləsiz olaraq su ilə təmin olunması özlüyündə çox təqdirəlayiq haldır. Görünən odur ki, bu istiqamətdə sistemli tədbirlər görülür. Önəmli olan odur ki, bununla bağlı layihələrin tam həyata keçirilməsi üçün ortada qəti məqsəd var. Hesab edirəm ki, bunun özü çox müsbət haldır. Bu istiqamətdə həyata keçirilən layihələrin gedişi göstərir ki, qarşıdakı illərdə ölkənin bütün şəhərlərində əhali 100 faiz tam standartlara uyğun içməli su ilə təmin olunacaq. Nəzərə alsaq ki, ölkə əhalisinin böyük hissəsi şəhərlərdə cəmləşib, o baxımdan bu istiqamətdə görülən işlərə müsbət yanaşıram”.
Vidadi ORDAHALLI
