Vüqar Bayramov: “Bu il iqtisadi diversifikasiya ilə bağlı islahatlar davam edəcək”
Bu gün Azərbaycan iqtisadiyyatında müşahidə olunan inkişaf dinamikası bütün sferalarda bu və ya digər dərəcədə özünü göstərir. Belə ki, hökumətin 2016-cı ilin əvvəlindən həyata keçirməyə başladığı tədbirlər öz səmərəsini verir. Məsələ ondadır ki, iqtisadiyyatın idarəetmə sisteminin təkmilləşdirilməsi ilə yanaşı, bütün istiqamətlər üzrə qənaətə keçməklə mövcud büdcə-vergi siyasətinin dəyişdirilməsi, o cümlədən, pul-kredit siyasətinin daha da sərtləşdirilməsi iqtisadi inkişaf üçün zəmin yaradıb.
Mövcud reallıq ondan ibarətdir ki, ölkənin qeyri-neft sektorunda inkişaf davam edir. Bununla yanaşı, hökumətin qeyri-neft məhsullarının ixracının getdikcə genişləndirilməsi istiqamətindəki tədbirləri yeni vüsət alır. Məlumat üçün qeyd edək ki, 2018-ci ildə qeyri-neft sektorunda 2,9 faiz, növbəti illərdə isə orta hesabla 3 faizdən yuxarı artım proqnozlaşdırılır. Bütün bunlar çox ciddi rəqəmlərdir.
Digər tərəfdən, Azərbaycanda müşahidə olunan iqtisadi inkişafı və bunun vəd etdiyi perspektivləri beynəlxalq qurumlar da təsdiq edir. Bunun nəticəsidir ki, Avropa Yenidənqurma və İnkişaf Bankı (AYİB) Azərbaycanla bağlı növbəti nikbin proqnoz verib. Belə ki, bu il AYİB Azərbaycanda 5-9 faiz səviyyəsində birrəqəmli inflyasiya proqnozlaşdırır. Bunu bankın Azərbaycandakı nümayəndəliyinin rəhbəri İvana Duarte mətbuata açıqlamasında deyib.
İ.Duarte qeyd edib ki, Azərbaycan iqtisadiyyatı artım nümayiş etdirir, neftdən asılılığın azaldılmasında nailiyyətlər əldə edir: “Hökumət nümayəndələri ilə görüşlərimiz zamanı biz onların iqtisadiyyatın şaxələnməsinə sadiqliyini müşahidə edirik. Azərbaycan hökuməti kiçik şirkətərin inkişafı və onların qeyri-neft sektorunda aktiv fəaliyyəti üçün şəraitin yaradılması məqsədilə səy göstərir”.
Azərbaycan iqtisadiyyatının inkişafı ilə bağlı proqnozlardan danışan İ.Duarte qeyd edib ki, 2018-ci ildə ÜDM-in 2 faiz artacağını gözləyir.
Ümumilikdə, AYİB-nin Azərbaycanla bağlı proqnozunu ekspertlər necə şərh edirlər?
Məsələyə münasibət bildirən iqtisadçı-ekspert Vüqar Bayramovun sözlərinə görə, AYİB tərəfindən Azərbaycanla bağlı daha pozitiv proqnozların verilməsi müsbət haldır: “Nəticə etibarilə bu, 2018-ci ildə Azərbaycan iqtisadiyyatı ilə bağlı verilən müsbət proqnozların bir daha təsdiq olunması anlamına gəlir. Nəzərə alsaq ki, AYİB-nin əvvəlki proqnozlarında da Azərbaycan iqtisadiyyatı ilə bağlı müsbət məqamlar öz əksini tapmışdı, o baxımdan növbəti bənzər proqnozun verilməsi, bir növ, gözlənilən idi. Yeni proqnozlar isə, əslində, inkişafla bağlı daha ciddi gözləntilərin olmasından xəbər verir. Bu, nəticə etibarilə, 2018-ci ilin hətta proqnozlaşdırıldığından da daha yüksək səviyyədə başa vurulacağı anlamına gəlir. O cümlədən, bu il inflyasiyanın birrəqəmli olacağı gözlənir. Mövcud vəziyyət bu qənaətə gəlməyə əsas verir. Çünki neftin dünya bazarındakı qiymətinin stabilləşməsi və iqtisadiyyatın şaxələndirilməsi 2018-ci ildə Azərbaycan iqtisadiyyatının inkişafı üçün real zəmin formalaşdırır. Digər tərəfdən, 2017-ci ildə iqtisadiyyatda əldə edilən stabillik də bunun üçün baza rolunu oynayır. O baxımdan, 2018-ci ildə iqtisadiyyatın şaxələndirilməsi ilə bağlı islahatların davam edəcəyi gözlənir. Bunu bir sıra beynəlxalq qurumlar və o cümlədən, AYİB də proqnozlaşdırır. Bu isə o deməkdir ki, həyata keçirilən islahatlar nəticəsində 2018-ci ildə əldə edilən iqtisadi artım iqtisadiyyatın şaxələndirilməsinə daha əlverişli şərait yaradacaq. Bu da, nəticə etibarilə, neftdən asılılığın aradan qaldırılması və qeyri-neft sektorunun ümumi iqtisadiyyatda payının artırılması baxımından vacibdir. Bu həm də o qənaətə gəlməyə əsas verir ki, bu il iqtisadi diversifikasiya ilə bağlı islahatlar davam edəcək. Bu da ümumən öz səmərəsini verəcək”.
Cəmilə QARAYEVA
