Nüsrət İbrahimli: “Hazırda avtomobil bazarında durğunluq yaşanır, yeni və ya ikinci əl avtomobillərdə satış əvvəlki səviyyədə deyil”
Məlumatlara görə, cari ilin ilk aylarında Azərbaycanda avtomobil satışı azalıb. Azalma tək yeni avtomobillərdə deyil, eyni zamanda, ikinci əl avtomobilləri alan, demək olar ki, tapılmır.
Qeyd edək ki, Nazirlər Kabinetinin "Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə etdiyi dəyişikliyə əsasən, 2018-ci il yanvarın 1-dən istifadə müddəti bir ilə qədər olan minik avtomobillərinin idxalına tətbiq olunan gömrük rüsumu 75 faiz, istifadə müddəti bir ildən artıq olan avtomobillər üçün 71,4 faiz artırılıb.
Sözügedən qərar qüvvəyə mindikdən sonra avtomobil bazarında qiymət artımı müşahidə edilir.
Ekspertlərin fikrincə, məlum qərar bu ilin ilk aylarından köhnə avtomobillərin qiymətində artıma səbəb olub. Məsələn, ötən ilin sonlarında 5000 manata satılan 1991-ci ilin "Mercedes"i hazırda 7000 manata satılır.
Daşınmaz əmlak məsələləri üzrə ekspert Nüsrət İbrahimli “Bakı-Xəbər”ə açıqlamasında qeyd etdi ki, ötən ilin noyabr ayından sonra avtomobil bazarında alıcı problemi yaranıb: “Bəllidir ki, ötən ilin sonlarından etibarən bu sahədə bahalaşma yaşandı. Potensial alıcılar, demək olar ki, tam olaraq sıradan çıxdı. Avtomobil satışının azalmasının müxtəlif səbəbləri var. İlk olaraq, qiymət artımı, daha sonra yanacağın qiymətinin dəyişməsi və əhalinin gəlirinin azalması alıcılıq qabiliyyətinə təsir edir”.
Həmsöhbətimizin sözlərinə görə, alıcılıq qabiliyyətinə təsir edən əsas faktor bank kreditləridir. Kreditin məhdud şəkildə verilməsi alıcı sayına təsir göstərir: “2017-ci ilin ikinci yarısında avtomobil bazarında aktivlik hiss olunurdu. Ancaq sonlarında isə gömrük rüsümlarının dəyişməsi bazara öz təsirini göstərdi”.
N.İbrahimli onu da əlavə etdi ki, avtomobil bazarında durğunluq yaşanır, yeni və ya ikinci əl avtomobillərdə satış əvvəlki səviyyədə deyil.
Günel CƏLİLOVA
