Vüqar Bayramov: “Bu, Azərbaycan iqtisadiyyatının sabit inkişaf edəcəyindən xəbər verir”
“2017-ci ildə Azərbaycanda makrosabitlik yaxşılaşıb”. Bu barədə “Fitch” beynəlxalq reytinq agentliyi məlumat yayıb. Beynəlxalq agentliyin hesabatında Azərbaycanın milli valyutasının növbəti iki ildə sabit qalacağı qeyd olunub.
Beynəlxalq maliyyə qurumları Azərbaycanda həyata keçirilən iqtisadi islahatları müsbət dəyərləndirirlər. Dünyanın tanınmış “Fitch” beynəlxalq reytinq agentliyi 2017-ci ildə Azərbaycanda makrosabitliyin yaxşılaşdığını açıqlayıb. Qurumun yaydığı hesabatda qeyd olunur ki, neft qiymətlərinin tədricən artması, o cümlədən dövlət büdcəsinin gəlir və xərclərindən istifadəsi nəticəsində dolların manata nisbətən məzənnəsi keçən ildən etibarən 1 manat 70 qəpik səviyyəsində stabilləşib. “Bu da, öz növbəsində, 2017-ci ildə 12,9 faiz səviyyəsində olan inflyasiya təzyiqlərini azaltmağa gətirib çıxarıb. Ötən ilin mart ayı ilə müqayisədə apreldən etibarən inflyasiya azalıb. Kreditlərin və depozitlərin dollarlaşma səviyyəsi (2017-ci il noyabrın sonuna müvafiq olaraq 40,6 faiz və 72,1 faiz) yavaş-yavaş azalır, bu da məzənnəyə inamın müəyyən qədər artdığını göstərir. Neft qiymətlərinin sabit olması ilə bağlı gözləntiləri nəzərə alaraq növbəti iki il ərzində manatın məzənnəsinin dəyişməyəcəyini proqnozlaşdırırıq,” - deyə məlumatda qeyd olunub.
“Fitch”ın proqnozuna əsasən, Azərbaycan ixracatının idxalı təxminən 5 milyard dollara yaxın üstələməsi ölkəyə daxil olan valyutanın həcminə də təsir göstərir.
Bütövlükdə, Azərbaycanın milli valyutasının növbəti iki ildə sabit qalacağı ilə bağlı proqnoza ekspertlər necə yanaşırlar? Məsələyə münasibət bildirən iqtisadçı-ekspert Vüqar Bayramovun sözlərinə görə, ölkəyə daxil olan valyutanın həcminin ölkədən çıxan valyutanın həcmini üstələməsi, öz növbəsində, manatın stabilliyi üçün zəmin yaradır: “Sözügedən agentliyin ekspertləri növbəti iki ildə milli valyutanın məzənnəsinin qorunub saxlanacağını proqnozlaşdırırlar. Güman olunur ki, ölkədə həm qeyri-neft sektorunun inkişafı, həm də dünya bazarında neftin qiyməti mövcud məzənnəni qorumaq üçün zəmin yaradır. Mərkəzi Bankın da mövcud siyasəti məhz manatın məzənnəsini qoruyub saxlamaqdan ibarətdir. “Fitch”in araşdırmalarına əsasən, 2018 və növbəti illərdə makroiqtisadi sabitliyi qoruyub saxlamaq mümkün olacaq. Eyni zamanda, agentliyin ekspertləri 2018-ci ilin dövlət büdcəsində profisitin əldə ediləcəyini proqnozlaşdırırlar. Bu o deməkdir ki, 2018-ci ilin dövlət büdcəsinin gəlirləri xərclərindən çox olacaq. Büdcədə neftin qiymətinin 45 dollar nəzərdə tutulmasına baxmayaraq, hazırda dünya bazarında neftin qiyməti daha yüksəkdir. Bununla yanaşı, dövlət büdcəsinə qeyri-neft sektorundan daxilolmaların artması da manatın məzənnəsinin sabit qalmasına öz müsbət təsirini göstərir. O baxımdan, sözügedən beynəlxalq agentliyin Azərbaycanla bağlı hesabatı və proqnozu sadalanan iqtisadi faktorlara əsaslanır. Bu, Azərbaycan iqtisadiyyatının sabit inkişaf edəcəyindən xəbər verir. Beynəlxalq agentliyin məlumatında o da vurğulanır ki, ötən ilin mart ayı ilə müqayisədə apreldən etibarən inflyasiya azalıb. Kreditlərin və depozitlərin dollarlaşma səviyyəsi yavaş-yavaş azalır. Bütün bunlar da məzənnəyə inamın müəyyən qədər artdığını göstərir. Hesab edirəm ki, agentliyin manatın məzənnəsi ilə bağlı hesabatı reallığa əsaslanır”.
Vidadi ORDAHALLI
