Samir Əliyev: “Son zamanlar bankların bağlanması əhalinin banklardan kənar əməliyyat aparmasına səbəb olur”
Azərbaycanda banklardan kənarda nağd pul kütləsi (M0 aqreqatı) aylıq müqayisədə 340,9 mln. manat və ya 4,8 % artaraq 2018-ci il yanvarın 1-nə 7 490,3 mln. manata yüksəlib. Bu barədə Azərbaycan Mərkəzi Bankının illik maliyyə hesabatına istinadən xəbər verilir. Hesabata əsasən, ötən ilin eyni dövrü ilə müqayisədə 1 113,4 mln. manat və ya 17,5% artım qeydə alınıb.
Qeyd edək ki, ölkədə nağd pul kütləsinin tarixi maksimal səviyyəsi 2014-cü il iyul ayında qeydə alınıb və 10 508,9 mln. manat təşkil edib.
Azərbaycanda banklardan kənarda nağd pul kütləsinin 18 faiz artmasının səbəblərini öyrənmək məqsədilə iqtisadçı-ekspert Samir Əliyevə müraciət etdik. İqtisadçı “Bakı-Xəbər”ə açıqlamasında banklardan kənarda nağd pul kütləsinin artması səbəbinin pul kütləsinin artması ilə bağlı olduğunu qeyd etdi: “Məlumdur ki, bir müddət öncə Mərkəzi Bank xeyli miqdarda pul kütləsini azaltdı. Ancaq hazırda bu sahədə müəyyən dərəcədə artım qeydə alınır. O da məlumdur ki, hazırda nağd pul kütləsi devalvasiyadan əvvəlki həddə deyil”.
Müsahibimizin sözlərinə görə, son zamanlar banklardan kənarda nağd əməliyyatların həcmində artım qeydə alınır. Məlum olduğu kimi, nağdsız əməliyyatların aparılması barəsində qərar qəbul olunub. Bu qərar bir qədər nağdsız ödənişlərin hesabına dəyişməlidir: “Hesab edirəm ki, növbəti ildə banklardan kənar nağd pulların qazanılmasını müşahidə edə bilərik”.
Həmsöhbətimizin fikrincə, banklardan kənar nağd pul kütləsinin artmasının bir səbəbi də texniki məsələlərlə bağlıdır. Banklara etimadın itməsi bu sahəyə öz təsirini göstərir: “Bəllidir ki, son zamanlar bankların bağlanması əhalinin banklardan kənar əməliyyat aparmasına səbəb olur. Hesab edirəm ki, növbəti dövrün hesabatlarında artım tempi aşağı düşəcək”.
Günel CƏLİLOVA
