İlqar Hüseynli: “Ölkə tranzit daşımalardan böyük gəlir əldə edəcək”
Azərbaycanın “Vikinq” dəmir yolu layihəsində iştirakı Avrasiya nəqliyyat dəhlizindən (TRACECA) keçməklə Mərkəzi Asiya və Çindən yük axınını cəlb etməyə imkan verəcək. Məlumata görə, bunu mətbuata “Litva dəmir yolları” Səhmdar Cəmiyyətindən bildiriblər.
Bununla bağlı yayılan məlumatda qeyd edilir ki, onlar Azərbaycanın bu layihəyə qoşulmasını müsbət dəyərləndirirlər: “Biz Azərbaycan Dəmir Yolları”nın və onun operatoru “Karvan Logistics”in “Vikinq” layihəsinə qoşulmasını müsbət dəyərləndiririk. Bundan başqa, “Azərbaycan Dəmir Yolları” QSC İrana yüklərin tranziti təşəbbüsü ilə iştirak edib”.
Məlumatda o da vurğulanır ki, bu günədək “Vikinq” marşrutu ilə hərəkət edən konteynerlər Azərbaycandan keçməyib, amma yeni İran marşrutunun işə salınması ilə bağlı planlar Azərbaycan üçün yeni tranzit yollarının yaradılması yönündə yaxşı imkan ola bilər.
Bundan başqa, “Vikinq” layihəsinin “Transxəzər” beynəlxalq nəqliyyat marşrutuna qoşulması nəzərdə tutulur.
Məlumat üçün qeyd edək ki, “Vikinq” layihəsi Litva, Belarus və Ukrayna tərəfindən 2003-cü ildə işə salınıb. Azərbaycan bu layihəyə 2016-cı ildə qoşulub. Azərbaycan bu layihəyə qoşulsa da, hələlik daşımalarda aktiv iştirak etmir. O baxımdan İran marşrutunun işə salınmasından sonra Azərbaycanın bu layihədə aktiv iştirakı perspektivlərini ekspertlər necə dəyərləndirirlər?
Məsələyə münasibət bildirən ekspert İlqar Hüseynlinin sözlərinə görə, sözügedən nəqliyyat layihəsi Azərbaycan üçün müəyyən perspektivlər vəd edir: “Ümumiyyətlə, ölkə iqtisadiyyatının inkişafına xidmət edən bütün layihələrdə Azərbaycanın iştirakı məqsədəuyğundur. Bununla bağlı Azərbaycanın öz mövqeyini ortaya qoyması, beynəlxalq danışıqlara qoşulması, o cümlədən dəmir yolu şəbəkəsinin genişləndirilməsi müsbət haldır. Nəzərə almaq lazımdır ki, Bakı-Tiflis-Qars dəmir yolunun istifadəyə verilməsi ölkə üçün yeni fürsət yaradıb. Ona görə də bu şəbəkənin nə qədər çox genişləndirilməsinə şərait yaradılacaqsa, bu bir o qədər Azərbaycanın xeyrinədir. Digər ölkələrin dəmir yolu sistemlərinin bizim ümumi nəqliyyat sistemimizə birləşdirilməsi halı baş verərsə, bu, ölkəmiz üçün daha çox faydalı ola bilər. Hesab edirəm ki, bu mənada Azərbaycan “Vikinq” layihəsində fəal iştirak edərsə, bu, bir sıra iqtisadi perspektivlər vəd edəcək. Böyük bir dəmir yolu şəbəkəsinə qoşulmağımız, təbii ki, ölkə büdcəsinə gəlir gətirər. Nəticə etibarilə bu, bizim beynəlxalq yükdaşımalarda fəal iştirakımızı təmin edəcək. Hesab edirəm ki, İran marşrutunun işə salınmasından sonra Azərbaycanın “Vikinq” dəmir yolu layihəsindən istifadə imkanları artacaq. Yənu sözügedən dəmir yolu layihəsinin imkanlarından istifadə etmək zərurətinin yaranması ehtimalı böyükdür. Bunun nəticəsində Çindən və digər ölkələrdən gələn yükləri Skandinaviya və Şərqi Avropa ölkələrinə daşımaq üçün yeni imkanlar yaranacaq. Bu da, öz növbəsində, Azərbaycanın regionda tranzit ölkə olaraq rolunu artıracaq. Eyni zamanda, Azərbaycan tranzit daşımalardan böyük gəlir əldə edəcək. Bir sıra nəqliyyat dəhlizlərinin Azərbaycandan keçməsi, burada şaxələnməsi ciddi perspektivlər vəd edir. Ona görə də arzuolunandır ki, Azərbaycan sözügedən nəqliyyat layihəsində fəal iştirak etsin”.
Vidadi ORDAHALLI
