Rəşad Həsənov: "Bu gün yekunlaşmaqda olan layihələrin faktiki reallaşmasına nail ola bilib"
Azərbaycanın beynəlxalq nəqliyyat dəhlizlərinə çıxışı genişlənməkdə davam edir. Ölkəmiz strateji coğrafi mövqeyi ilə əlaqədar olaraq nəqliyyat dəhlizlərində həm də tranzit ölkə kimi mövqeyini möhkəmləndirir.
Azərbaycan öz əlverişli coğrafi yerləşməsinə görə Asiya və Avropa qitələri arasında körpü rolunu oynayır. Avrasiya məkanında aparıcı rola malik olan "Şərq-Qərb" və "Şimal-Cənub" nəqliyyat dəhlizlərində önəmli yer tutur. Azərbaycan mövcud nəqliyyat potensialını və tranzit imkanlarını artırmaq, bu sahədə öz rəqabətqabiliyyətliliyini yüksəltmək məqsədilə böyük sərmayələr qoyur, ölkə daxilində və regionda irimiqyaslı infrastruktur layihələrini həyata keçirir. Buna uğurlu misal kimi, Bakı-Tiflis-Qars dəmir yolu və yeni Bakı Beynəlxalq Dəniz Ticarət Limanı layihələrini qeyd etmək olar. "Şərq-Qərb" nəqliyyat dəhlizi vasitəsilə Asiyadan Avropaya daşınan yüklərin həcminin artım templərini nəzərə alaraq, həmin yüklərin qısa vaxt müddətində çatdırılması məsələsi gündəmə çıxır.
Eyni zamanda, "Şimal-Cənub" nəqliyyat dəhlizi üzrə maraqlı ölkələrlə dialoq davam etdirilir. Mövcud olan avtomobil nəqliyyatı ilə yanaşı, dəmir yolu infrastrukturunun da inkişaf etdirilməsi, o cümlədən Qəzvin-Rəşt-Astara (İran) - Astara (Azərbaycan) dəmir yolu xətti layihəsinin reallaşdırılması istiqamətində tərəflər arasında danışıqlar aparılır.
Azərbaycanın Avropa İttifaqı yanında daimi nümayəndəsi, Belçikadakı səfiri Fuad İsgəndərov müsahibəsində bildirib ki, Avropanın bu dəhlizlərin reallaşmasına verdiyi dəstək artmalıdır. Ümumilikdə götürəndə Avropa sözügedən nəqliyyat dəhlizlərinin reallaşmasında Azərbaycana dəstək verirmi? Bu sahədə vəziyyət necədir?
Məsələyə münasibət bildirən iqtisadçı-ekspert Rəşad Həsənovun sözlərinə görə, Avropanın bu yöndə Azərbaycana dəstəyi var: "Bu istiqamətdə strateji əhəmiyyətini artırmağa hədəflənən layihələr müəyyənləşdirilib. Bununla bağlı müəyyən layihələrin həyata keçirilməsi ilə bağlı qərarlar qəbul edildi. İlk addım TRASEKA proqramının qəbul edilməsi oldu. Azərbaycanın "İpək yolu" nəqliyyat dəhlizinin yenidən qurulmasının birbaşa təşəbbüskarlarından biri kimi çıxış etməsi və s. bura daxildir. Azərbaycan bu istiqamətdə qərarlı olmasını ortaya qoymaqla yanaşı, həmçinin, gələcək növbəti dövrlərdə bəhs etdiyimiz layihələrə AB ölkələrinin, quruma daxil olmayan digər ölkələrin və Qərbin digər institutlarının birbaşa həm maliyyə, həm də siyasi dəstəyini biz müşahidə edirik. Bu dəstək sayəsində Azərbaycan bir sıra iri layihələrin həyata keçirilməsinə nail oldu. Bu gün yekunlaşmaqda olan layihələrin faktiki reallaşmasına nail ola bilib. Bu baxımdan da düşünürəm ki, Avropanın, xüsusilə Azərbaycanın coğrafi mövqeyini nəzərə alsaq, bu yöndə dəstəyi var. Rusiya və digər faktorları qiymətləndirməyə çalışsaq görərik ki, bu layihələr bəzi güclərin maraqlarına xidmət etmir. Ona görə də bununla bağlı gələn təzyiqlərin qarşısının alınmasında Azərbaycan Avropanın dəstəyini hiss edir. Layihələrin reallaşması Azərbaycanın tranzit əhəmiyyətini artırmaqla yanaşı, eyni zamanda növbəti illərdə irihəcmli tranzit gəlirlərinin əldə olunmasına da təkan verəcək". Vidadi ORDAHALLI
