Fikrət Yusifov: "Cari il ərzində nağdsız əməliyyatların 93 faiz artması iqtisadi artımdan xəbər verir"
Son dövrlər qeyri-neft sektorunun inkişafı çərçivəsində turizmə yönəlmiş məqsədyönlü tədbirlər nəticəsində bu sahənin intensiv inkişafı üçün geniş imkanlar yaranıb. Təsadüfi deyil ki, Azərbaycana gələn əcnəbilərin sayında və uyğun olaraq onların nağdsız ödənişlərinin həcmində artım müşahidə olunur.
Mədəniyyət və Turizm Nazirliyinin yaydığı məlumata əsasən, 2017-ci ilin birinci yarısında Azərbaycana gələn xarici vətəndaşların bank kartları üzrə əməliyyatları ötən ilin müvafiq dövrü ilə müqayisədə 93 faiz artaraq 507 milyon 450 min 635 manat təşkil edib. Bu göstərici 2016-cı ilin birinci yarısında 263 milyon 427 min 544 manat, il ərzində isə 602 milyon 288 min 119 manat olub.
Məlumat üçün bildirək ki, qeyd olunan vəsaiti ölkəmizə gələn əcnəbilərin Azərbaycanda bank kartları vasitəsilə həyata keçirdiyi ödənişlər təşkil edir, onların səfərdən qabaq və ölkə daxilində nağd ödənişləri bu məbləğə daxil deyil.
Qeyd edək ki, Dünya Səyahət və Turizm Şurasının məlumatına əsasən, Azərbaycan üzrə 2016-cı ildə turizm xidmətlərinin ixracının ümumi dövriyyəsi 2,8 milyard ABŞ dolları olub.
Ölkəmizə gələn əcnəbilərin nağdsız ödənişlərinin həcminin artması barədə fikir bildirən iqtisadçı, professor Fikrət Yusifov "Bakı-Xəbər"ə açıqlamasında qeyd etdi ki, bir çox ölkələrdə, xüsusilə də Avropa və Amerikada, ümumiyyətlə, aparıcı dünya ölkələrində nağdsız hesablaşmalar aparılır: "Bəllidir ki, ötən ilin sonlarından etibarən nağdsız hesablaşmalarla bağlı qanun qəbul olundu. Və həmin qanuna əsasən artıq bu sahədə də ölkə daxilində müəyyən addımlar atıldı. Nağdsız ödənişlərin həcminin artması müsbət hal kimi dəyərləndirilməlidir. Artıma səbəb aparılan əməliyyatların sadələşdirilməsidir. Ümumiyyətlə, nağdsız əməliyyat alıcı və satıcının rahatlığı deməkdir".
Həmsöhbətimizin fikrincə, ölkə daxilində də nağdsız əməliyyatlara üstünlük verilsə, daha yaxşı olar.
F.Yusifovun sözlərinə görə, cari il ərzində nağdsız əməliyyatların 93 faiz artması iqtisadi artımdan xəbər verir.
Günel CƏLİLOVA
