Vüqar Bayramov: "Artıq vətəndaşla bank işçisi arasında birbaşa ünsiyyət olmayacaq"
Məlum olduğu kimi, avqustun 1-dən Elektron İpoteka Sisteminin tətbiqinə başlanıb. Belə ki, Elektron İpoteka Sistemi "Elektron Hökumət Portalı"nın real vaxt rejimində əhalinin tam istifadəsinə verilib. Bundan sonra "Azərbaycan İpoteka Fondu"ndan ipoteka krediti almaq istəyən vətəndaşlar onlayn rejimində "Elektron Hökumət Portalı" vasitəsilə müraciət etməlidir.
Müraciət edən hər kəs qeydiyyatdan keçərkən Elektron İmza və ya "ASAN imza" əldə etməlidir. Artıq "Azərbaycan İpoteka Fondu"nun vəsaiti hesabına verilən ipoteka kreditindən istifadə etmək istəyən hər bir şəxs birbaşa internet vasitəsilə onlayn rejimdə "Elektron Hökumət Portalı"na daxil olaraq müvafiq qaydada ipoteka kreditinin alınması üçün müraciət edə bilər.
Yeni sistemin tətbiqi ipoteka kreditlərinə çıxış imkanlarının sadələşdirilməsinə, ipoteka krediti almaq istəyən şəxslər üçün bərabər şərait yaradılmasına, müraciətlərə baxılma zamanı şəffaflığın və operativliyin təmin edilməsinə, habelə informasiya-kommunikasiya texnologiyalarının imkanlarından faydalanaraq tələb olunan sənədləri real vaxt rejimində əldə etməklə, sərf olunan vaxta və xərclərə qənaət olunmasına, göstərilən xidmətlərin keyfiyyətinin və səmərəliliyinin artırılmasına xidmət edəcək. Görünən odur ki, bu, vətəndaşlara daha az vaxt sərf etməklə müraciət etmək imkanı qazandıracaq.
Maraqlıdır, bəs ekspertlərin sözügedən sistemin tətbiqinə münasibəti necədir?
Məsələyə münasibət bildirən iqtisadçı-ekspert Vüqar Bayramovun fikrincə, əvvəllər ipotekaya müraciət zamanı tələb olunan sənədlərin sayı 18 idisə, elektron ipoteka sisteminin tətbiq edilməsi sənədlərin kəskin şəkildə azalmasına gətirib çıxaracaq: "Bu zaman məlumatlar elektron olaraq bölüşdürüləcək. İş yerindən arayışın alınmasına ehtiyac olmayacaq, əmək müqaviləsi elektron olduğuna görə bu məlumatlar həmin şəxsin şəxsi kabinetinə əlavə olunacaq.
Yeni sistemin tətbiq edilməsi şəffaflığın artırılması baxımından da vacibdir. Məsələ ondadır ki, ipoteka krediti almaq üçün müraciət edən şəxslərin sorğusuna bəzən uzun müddət baxılmırdı. "Elektron Hökumət Portalı"na inteqrasiya olunandan sonra müraciətlərin sıralanması sistemi tətbiq olunacaq. Bu da yubanmaların qarşısını alacaq. Hər bir müraciətə qeydiyyat nömrəsi ilə baxılacaq və bank elektron qaydada birbaşa müraciətçinin özünə cavab verəcək. İpoteka kreditlərinin verilməsində şəffaflığı artırmaq mümkün olacaq. Banklar müraciətlərin vaxtına və sırasına uyğun olaraq baxacaq. Süründürməçiliyə yol verilməyəcək. Eyni zamanda, çox fərqi səbəblərdən yubandırmaların qarşısı alınacaq. Bu, korrupsiya ilə mübarizə baxımından da vacibdir. Bəzi banklarda ipoteka kreditləri verilərkən qeyri-rəsmi ödənişlərin tələb edilməsi halları var idi. Nəticədə vətəndaşın xərci daha çox olurdu. Artıq vətəndaşla bank işçisi arasında birbaşa ünsiyyət olmayacaq".
Vidadi ORDAHALLI
