Rəsul Cahangirli: "Sığorta şirkətlərinin müxtəlif bəhanələrlə ödənişlərdən boyun qaçırmağa çalışması insanların inamsızlığına gətirib çıxarır"
Son zamanlar vətəndaşların sığorta şirkətlərindən şikayətləri artıb. Problem ondadır ki, sığorta şirkətləri öz öhdəliklərini yerinə yetirmir. Bu da vətəndaşların narazılığına səbəb olur. Məsələn, sığorta şirkəti zərərçəkənin avtomobilinə dəyən zərəri ödəməkdən yayınır.
Vətəndaş üzərindən bir il keçməsinə baxmayaraq, hələ də sığorta şirkətindən heç bir manat da pul ala bilməyib. Maraqlı hadisə Namiq Hüseynovun başına gəlib. Belə ki, 2016-cı il martın 30-da sığorta şirkətinin nümayəndəsi hadisə yerinə gələrək N.Hüseynovun avtomobilini vuran şəxsin ona 1065 manat ziyan vurduğunu müəyyən edib və qısa zamanda pulun ödəniləcəyini bildirib. Ancaq indiyədək sığorta şirkəti verdiyi vədi yerinə yetirməyib. Sığorta şirkəti pulu vermədiyinə görə borca düşdüyünü deyən N.Hüseynov hələ də həmin borcu qaytara bilmədiyini deyir. Məsələ ilə bağlı sığorta şirkətinə müraciət olunsa da, şirkət müştərilərlə bağlı məlumatın gizli olduğunu əsas gətirərək, məlumat verməkdən imtina edib.
Aydın məsələdir ki, vəziyyət bu həddə çatanda vətəndaş məhkəməyə müraciət etməli olacaq. Ancaq problem ondadır ki, bir sıra sığorta şirkətləri müxtəlif bəhanələrlə vətəndaşlar qarşısında öhdəliklərini yerinə yetirmir və bundan yayınır. Maraqlıdır, bunun kökündə dayanan səbəblər nədir və problemi necə həll etmək olar?
Məsələyə münasibət bildirən ekspert Rəsul Cahangirli bunu bir sıra amillərlə əlaqələndirdi: "Azərbaycanda baş verən iki devalvasiya bank sektoruna ciddi təsir göstərdiyi kimi, sığorta şirkətlərindən də yan keçməyib. Belə ki, qısa müddət ərzində ölkədə bir neçə sığorta şirkəti və sığorta agentliyinin lisenziyaları ləğv edilib. Yəni sığorta şirkətlərinin imkanları xeyli daralıb. Ona görə də müxtəlif vasitələrlə öhdəlikləri yerinə yetirməkdən yayınırlar. Problemin kökündə dayanan əsas faktor bununla bağlıdır. Bu proses hazırda da davam edir. Nəticədə müştərisi az, kapitalı olmayan sığorta şirkətləri bazarı tərk etmək məcburiyyətində qalır. Bütün bunlar həm də əhalinin bu sektora inamını günü-gündən azaldır. Problemlərdən biri də ölkədə insanların sığorta şirkətləri haqqında məlumatının yetərli səviyyədə olmamasıdır. Sığorta şirkətlərinin müxtəlif bəhanələrlə ödənişlərdən boyun qaçırmağa çalışması insanların inamsızlığına gətirib çıxarır".
Vidadi ORDAHALLI
