Qadir Bayramlı: "Barama istehsalçılarına subsidiyanın verilməsi bu sahənin inkişafına müsbət təsir göstərəcək"
Barama istehsalçılarına subsidiyanın verilməsi məqsədilə Respublika Komissiyasının növbəti iclası keçirilib.
Kənd Təsərrüfatı Nazirliyinin mətbuat xidmətinin yaydığı məlumatda qeyd olunur ki, iclasda barama istehsalçılarına subsidiyanın verilməsi ilə əlaqədar sənədlərə baxılıb və 898 barama istehsalçısına barama emalı və ipək istehsalı müəssisələrinə təhvil verdikləri 85559,11 kq yaş baramanın hər kiloqramına görə 5 (beş) manat olmaqla dövlət büdcəsinin vəsaiti hesabına ümumilikdə 427795,55 manat məbləğində subsidiyanın verilməsinə dair qərar qəbul edilib.
Barama istehsalçılarına subsidiyanın ödənilməsi məqsədilə müvafiq sənədlər Maliyyə Nazirliyinə, "Kapital Bank" ASC-yə və aidiyyəti rayon (şəhər) kənd təsərrüfatı idarələrinə və rayon komissiyalarına göndərilib.
Respublika Komissiyasının keçirilən iclaslarında ümumilikdə 21 rayon (şəhər) üzrə 1386 istehsalçıya 133503,62 kq yaş baramanın miqdarına görə dövlət büdcəsinin vəsaiti hesabına 667518,10 manat məbləğində subsidiyanın verilməsinə dair qərar qəbul edilib.
Barama istehsalçılarına subsidiyaların verilməsi bu sahənin inkişafına necə təsir göstərəcək?
Məsələ ilə bağlı Azərbaycan Dövlət İqtisad Universitetinin dosenti Qadir Bayramlıya müraciət etdik. O, "Bakı-Xəbər"ə açıqlamasında qeyd etdi ki, barama istehsalçılarına subsidiyanın verilməsi bu sahənin inkişafına müsbət təsir göstərəcək: "Çünki Azərbaycanda kənd təsərrüfatı sahəsindəki subsidiyaların miqdarı azdır. Subsidiyanın verilməsi baramaçıların təşviq olunmasına səbəb olacaq. Həmçinin, nəticə etibarilə istehsalın artmasına təsir göstərəcək. Və istehsal artarsa, istehsal olunan məhsulun bir hissəsinin ixracat imkanı daha rahat olacaq".
Həmsöhbətimizin sözlərinə görə, subsidiya tək baramaçılıqda yox, digər sahələrdə də verilir. Q.Bayramlının fikrincə, kənd təsərrüfatının inkişafı üçün subsidiya davamlı olaraq verilməlidir: "Subsidiyanın verilməsində şəffaflıq məsələsi də təmin olunmalıdır. Subsidiya almaqla bağlı bütün fermerlər üçün eyni dərəcədə şərait yaradılarsa, bu hal baramaçılığın inkişafına səbəb olacaq. Tək baramaçılığın yox, ümumi aqrar sahənin inkişafına təsir göstərəcək".
Günel CƏLİLOVA
