Zakir Əhmədov: "MSŞ bütün resursları mobilizasiya edərək çevik siyasət yeridir"
Ötən il ölkə Prezidentinin fərmanı ilə Maliyyə Sabitliyi Şurası yaradılıb. Ölkə iqtisadiyyatının əsas prioritetlərindən olan qeyri-neft sektorunun inkişafında son illər ərzində bir sıra mühüm nailiyyətlər əldə edilib. Aparılan iqtisadi islahatlar nəticəsində iqtisadiyyatın diversifikasiyası bu sahənin inkişafını təmin etməklə, onun ümumdaxili məhsulda xüsusi çəkisinin əhəmiyyətli artımına səbəb olub. Ölkənin beynəlxalq aləmdə müsbət imici daha da möhkəmlənib, iqtisadi inkişafın davamlılığı təmin olunub.
Bununla belə, son dövrlərdə istər regionda, istərsə də qlobal iqtisadiyyatda təzahür edən proseslər, neft gəlirlərinin kəskin azalması və mürəkkəb xarici iqtisadi mühit ölkənin makroiqtisadi və maliyyə sabitliyinə öz təsirini göstərir. Dünyada cərəyan edən iqtisadi proseslərin yaratdığı yeni çağırışlara uyğunlaşmaq və mövcud qlobal iqtisadi böhranın ölkəmizə təsirini minimuma endirmək məqsədilə iqtisadiyyatın mövcud vəziyyətinin dərin təhlili və ölkədə müəyyən olunmuş iqtisadi islahatların əsas strateji hədəflərinə uyğun olaraq, sistem xarakterli bir sıra tədbirlərin həyata keçirilməsi qarşıda duran əsas prioritet vəzifələrdir.
Makroiqtisadi sabitliyin və milli iqtisadiyyatın rəqabət qabiliyyətinin qorunub saxlanması üçün belə bir qurumun yaradılması mühüm əhəmiyyət kəsb edir. Bu arada, Prezident İlham Əliyev "Azərbaycan Respublikasının Maliyyə Sabitliyi Şurasının Əsasnaməsi"nin təsdiq edilməsi haqqında Fərman da imzalayıb.
Ümumilikdə ötən dövrdə qurum ölkədə maliyyə sabitliyinin təmin olunmasında hansı addımları atıb? Məsələyə münasibət bildirən ekspert Zakir Əhmədovun fikrincə, makroiqtisadi sabitliyin daha da möhkəmləndirilməsi və maliyyə dayanıqlığının təmin edilməsi baxımından belə bir qurumun yaradılması mühüm əhəmiyyət kəsb edir: "Bu sahədə koordinasiya olunmuş siyasətin həyata keçirilməsi, habelə səmərəli tənzimləmə mexanizminin həyata keçirilməsi baxımından belə bir qurumun olması müsbət haldır. Qurumun əsasnaməsi yeni təsdiq olunsa da, hər halda, iqtisadi sahədə müəyyən işlərin görülməsinə öz töhfəsini verib. Çünki şuranın tərkibinə həm maliyyə, həm də fiskal siyasətə cavabdeh olan qurumların rəhbərləri daxil edilib. Bu isə o deməkdir ki, maliyyə və fiskal siyasətlərin uzlaşdırılması üçün daha çevik vahid platforma yaranıb. MSŞ-nin tərkibinə baxılsa, burada üç tərəfin təmsil olunduğu görünür - Azərbaycan Respublikası Prezidentinin Administrasiyası, Nazirlər Kabinetinə birbaşa tabeçiliyi olan Maliyyə və İqtisadiyyat nazirlikləri, həmçinin, Nazirlər Kabinetinə daxil olmayan Mərkəzi Bank, Maliyyə Bazarlarına Nəzarət Palatası və Dövlət Neft Fondu. Bu mənada MSŞ bütün resursları mobilizasiya edərək çevik siyasət yeridir. Dünya təcrübəsinin təhlili göstərir ki, iqtisadi siyasətin ayrı-ayrı istiqamətlərinə cavabdeh olan qurumların bir platformadan koordinasiya olunması müsbət səmərəsini verir".
Vidadi ORDAHALLI
