Vüqar Bayramov: "2018-ci ilin əvvəllərindən etibarən Azərbaycanda yeni iqtisadi artımın hiss olunacağı artıq dünya ictimaiyyətinə bəllidir"
"Standard & Poor's" Beynəlxalq Reytinq Agentliyi Azərbaycanın yaxın 4 ildə iqtisadi perspektivləri barədə hesabatla çıxış edib. Agentlik Azərbaycanda iqtisadi artımın sürətlənəcəyini, inflyasiyanın azalacağını proqnozlaşdırır.
Azərbaycanda iqtisadi artım 2018-ci ildən etibarən sürətlənəcək, inflyasiyanın səviyyəsi isə azalacaq.
Hesabatda deyilir ki, Azərbaycan iqtisadiyyatı bu il 1 % geriləyəcək, amma 2018-ci ildə 2 %, 2019 və 2020-ci illərdə isə 3,5 % artım nümayiş etdirəcək. Adambaşına real ümumdaxili məhsul (ÜDM) 2017-ci ildə 2,2 % azalacaq, əvəzində 2018-ci ildə 0,8 %, 2019 və 2020-ci illərdə 2,3 % artacaq. Real investisiyalarda isə azalma olmayacaq və 2017-ci ildə 5,5 %, 2018-ci ildə 3,5 %, 2019-2020-ci illərdə isə hər il 2,5 % artacaq.
Agentlik inflyasiyanın bu il 9 %, gələn il 7 %, 2019 və 2020-ci illərdə isə 5 % olacağını ehtimal edir. "Standard & Poor's" iqtisadi artımla bağlı proqnozlarını yüksəltməsinə səbəb kimi Azərbaycanın "Şahdəniz" layihəsinin işə düşməsini göstərib.
"Standard & Poor's" Beynəlxalq Reytinq Agentliyinin qarşıdakı illər üzrə Azərbaycan iqtisadiyyatı barədə proqnozlarını şərh etməyi iqtisadçı-ekspert Vüqar Bayramovdan xahiş etdik. O, "Bakı-Xəbər"ə açıqlamasında qeyd etdi ki, beynəlxalq maliyyə qurumları və digər təşkilatlar 2017-ci ildə ölkəmizdə iqtisadi azalmanın qeydə alınacağını, növbəti ildə isə artımı proqnozlaşdırırlar: "Növbəti iki il ərzində iqtisadi artımın yenidən bərqərar olunması daha əvvəl də beynəlxalq maliyyə qurumları tərəfindən proqnozlaşdırılıb. İstər Beynəlxalq Valyuta Fondu, istərsə də digər beynəlxalq qurumların proqnozlarında Azərbaycan iqtisadiyyatında artımın qeydə alınacağı xüsusi olaraq vurğulanır. 2017-ci ildə iqtisadiyyatın sabitləşəcəyi gözlənir və bu proses cari ilin birinci yarımilliyinin yekunlarında da hiss olunmaqdadır. 2018-ci ilin əvvəllərindən etibarən Azərbaycanda yeni iqtisadi artımın hiss olunacağı artıq dünya ictimaiyyətinə bəllidir".
Günel CƏLİLOVA
