Natiq Cəfərli: "... real rəqəmlərdə də özünü göstərir"
Xəbər verildiyi kimi, Azərbaycandan tütün ixracı 5 faiz artıb. Bununla belə, tütün və onun sənaye əvəzedicilərinin ümumi ixracda payı cüzidir. Bu ilin yanvar-iyun aylarında Azərbaycana 72,454 mln. ABŞ dolları dəyərində tütün və tütün məmulatları idxal edilib.
Dövlət Gömrük Komitəsinin yaydığı məlumata əsasən, bu, ötən ilin eyni dövrü ilə müqayisədə 1,1 min dollar və yaxud 0,2 % çoxdur. Hesabat dövründə tütün və tütün məmulatları ümumi idxalın 2,1%-ni təşkil edib.
6 ay ərzində Azərbaycandan ixrac olunmuş tütün və onun sənaye əvəzedicilərinin dəyəri isə 6,079 mln. dollar təşkil edib. Bu isə 1 il əvvələ nisbətən 286 min dollar və yaxud 4,9 % çoxdur. Bu məhsulların ixracı ölkənin ümumi ixracının 0,1 %-nə bərabər olub.
Tütün ixracının artması barədə fikir bildirən ekspert Natiq Cəfərli "Bakı-Xəbər"ə açıqlamasında qeyd etdi ki, bu sevindirici haldır: "Bəllidir ki, tütünçülüklə bağlı 2015-ci ilin sonunda müəyyən qərarlar verildi və təşviq proqramları tərtib olundu. Bu proqramlar ənənəvi tütünçülük rayonlarında istehsalın və əkinçiliyin inkişafına səbəb oldu. Tütünçülüklə bağlı qəbul edilən qərarlar artıq öz bəhrəsini verir".
Həmsöhbətimizin sözlərinə görə, bu sahədə qeydə alınan inkişaf real rəqəmlərdə də özünü göstərir: "Bəllidir ki, əvvəllər bu sahədə vəziyyət fərqli idi. Ancaq indi müsbətə doğru dəyişiklik hiss olunur".
İqtisadçı onu da bildirdi ki, bizim keyfiyyətli məhsul istehsal etmək üçün təbii şəraitimiz, mütəxəssislərimiz və bu sahədə böyük ənənələrimiz var: "Üstəlik, həm ölkəmizdəki sənaye müəssisələrinin tələbatını ödəmək, həm də qonşu ölkələrə ixrac üçün kifayət qədər tütün istehsal etmək imkanımız var. Artıq öz məhsulumuzu xarici bazara çıxarmaq vaxtı çatıb. Tütünçülük spesifik sahədir, bu sahənin inkişafına xüsusi diqqət göstərilməlidir. Tütünün becərilməsində və qurudulmasında müasir texnologiyadan istifadə olunması təmin edilməlidir".
Günel CƏLİLOVA
