Rüfət Quliyev: "Qeyri-neft sektorunda qeydə alınan artımda turizmin rolu xüsusi qeyd olunmalıdır" Tahir Mirkişili: "İdxal əvəzedici istehsal sahələrinin canlanması və idxalın azalması da milli istehsalın artımına gətirib çıxarıb" Pərviz Heydərov: "Qeyri-neft iqtisadiyyatında 1,7 faiz artım bilavasitə aparılan iqtisadi islahatların nəticəsidir"
Ölkə başçısı İlham Əliyev qeyri-neft sektorunda 1,7 faiz artımı aparılan iqtisadi islahatların nəticəsi kimi qiymətləndirib. Prezident Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında Azərbaycan iqtisadiyyatının hazırkı vəziyyəti ilə bağlı fikir səsləndirib.
O qeyd edib ki, bütün bu uğurlara nail olmaq üçün bizim güclü iqtisadi potensialımız olmalıdır: "Altı ayın göstəriciləri məni çox qane edir. Qeyri-neft iqtisadiyyatımız altı ayda 1,7 faiz artıb. Bu çox yaxşı göstəricidir. Mən xüsusilə qeyri-neft iqtisadiyyatını qeyd edirəm. Çünki ümumi iqtisadi göstərici, yəni ümumdaxili məhsulun göstəriciləri daha çox neftin hasilatına və neftin qiymətinə bağlıdır. Bu da dəyişir. Ona görə bu bizim gördüyümüz işlərə qiymət vermək üçün əsas amil kimi qəbul edilə bilməz.
Qeyri-neft iqtisadiyyatımızda 1,7 faiz artım bizim apardığımız iqtisadi islahatların nəticəsidir. Hesab edirəm ki, bu xüsusilə indiki şəraitdə çox yaxşı göstəricidir. Qeyri-neft sənayesi daha çox artıb. Burada artım 4,4 faizdir. Hesab edirəm ki, bu da mümkün olan ən gözəl göstəricidir. Bu onu göstərir ki, islahatlar və apardığımız siyasət öz nəticəsini verir".
Qeyri-neft iqtisadiyyatında qeydə alınan 1,7 faizlik artım hansı amillərlə bağlıdır?
Milli Məclisin İqtisadi siyasət, sənaye və sahibkarlıq komitəsinin üzvü, professor Rüfət Quliyev "Bakı-Xəbər"ə açıqlamasında qeyd etdi ki, Prezident İlham Əliyev ölkənin 6 aylıq sosial-iqtisadi inkişafından razı qalıb: "Makroiqtisadi göstəricilərlə bağlı ölkə başçısı qeyd edib ki, 2016-cı ildə əsas hədəf maliyyə sabitliyi idi. Bu il isə iqtisadi artımdır. Xatırlayırsınızsa, Prezident 2017-ci ilin əsas hədəfinin investisiya artımı olmasını bildirmişdi. Bu hədəfin əsas yükü Bakı yox, regionların üzərinə düşür. Nəzərə almaq lazımdır ki, regionların bir qismi maliyyələşdirmə prinsipi ilə işləyəcək. Bu səbəbdən də regionlara investisiya cəlbi vacibdir. Rayona investisiya cəlb olunması sosial problemlərin həlli deməkdir. O cümlədən işsizlik problemi həll olunacaq".
Həmsöhbətimiz onu da bildirdi ki, ölkə iqtisadiyyatında qeydə alınan artımda turizmin də rolu qeyd olunmalıdır: "Ölkə başçısı turizmə ciddi fikir verir. Öz çıxışında turizm biznesində 25 faiz artımın olduğunu dilə gətirib. Turizm biznesi Azərbaycan üçün çox önəmlidir. Biz tək regionda yox, postsovet məkanında turizm sahəsi üzrə inkişaf etmiş ölkələrdən biriyik. Bu, qeyri-neft sektorunun artımı üçün bir təkamüldür. Artıq turizm sahəsi üzrə inkişaf etmiş Yunanıstan, Fransa, İspaniya, İsveçrə, Türkiyə və digər ölkələrə yaxın dura bilərik".
Millət vəkilinin sözlərinə görə, ölkə başçısının göstərişinə əsasən, qiymətlərə nəzarət sistemi tətbiq olundu. Hər hansı bir bazar iqtisadi inkişaf edən ölkədə dövlətin qiymətə nəzarət etməsi çətin prosesdir: "Sevindirici haldır ki, bizim ölkədə qiymətlərə nəzarət sistemi tətbiq olunub. Bu işdə əsas məsuliyyət İqtisadiyyat Nazirliyinin üzərinə düşüb.
Manatın məzənnəsinin xarici valyutaya nisbətən stabil qalması qeyri-neft sektorunun inkişafına səbəb olur. Azərbaycan yeganə ölkədir ki, özünü maliyyə və iqtisadi böhrandan qoruya bilir".
Millət vəkili Tahir Mirkişili də qəzetimizə açıqlamasında bildirdi ki, iqtisadi artım əsasən qeyri-neft sektorunda, qeyri-neft sənayesində, kənd təsərrüfatı məhsulları istehsalında müşahidə olunur: "İqtisadi artımın əsas səbəbi kimi ölkədə aparılan iqtisadi islahatları, makroiqtisadi sabitliyə nail olunmasını, ixrac həvəsləndirici tədbirlərin effektivliyini, xarici sərmayələrin yatırılmasını göstərmək olar. Həmçinin, idxal əvəzedici istehsal sahələrinin canlanması və idxalın azalması da milli istehsalın artımına gətirib çıxarıb".
İqtisadiyyat Nazirliyinin İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov bizimlə söhbətində bildirdi ki, Prezident İlham Əliyevin sədrliyi ilə Nazirlər Kabinetinin cari ilin birinci yarısında ölkənin sosial-iqtisadi inkişafının yekunlarına dair keçirilən iclasında qeyd edildi ki, əsas cəhət ondan ibarətdir ki, makroiqtisadi sabitlik qorunub saxlanır. Məqsəd də odur ki, bu tendensiya davam etsin: "1,7 faiz artım qeyri-neft sektoruna aiddir. Ümumi göstəricidə aşağı rəqəmlər qalmaqdadır. Lakin cənab Prezident də qeyd edib ki, ümumi iqtisadi göstərici, yəni ümumdaxili məhsulun göstəriciləri daha çox neftin hasilatına və neftin qiymətinə bağlıdır və bu da dəyişir, ona görə də bu, görülən işlərə qiymət vermək üçün əsas amil kimi qəbul edilə bilməz.
Qeyri-neft iqtisadiyyatında 1,7 faiz artım isə bilavasitə aparılan iqtisadi islahatların nəticəsidir. Dövlət başçısı da haqlı olaraq vurğulayıb ki, bu xüsusilə indiki şəraitdə çox yaxşı göstəricidir. Ümumiyyətlə, məlumdur ki, hazırda əsas prioritet qeyri-neft məhsulları istehsalı və onların ixracıdır. Odur ki, qeyri-neft sənayesinin (4,4 faiz) daha çox artması təqdirəlayiq tendensiyadır.
Yeri gəlmişkən, 2017-ci ilin yanvar-may aylarında 556,6 milyon dollar dəyərində qeyri-neft məhsulları ixrac edilib ki, bu da 2016-cı ilin yanvar-may aylarına nisbətən faktiki qiymətlərlə 22,1, real ifadədə isə 19,8 faiz çoxdur. Bir sözlə, əsas güc iqtisadiyyatın qeyri-neft sektoruna yönəldilib. Ona görə də əsas diqqət məhz bu sahənin nəticə və göstəricilərindədir".
Günel CƏLİLOVA
