İlham Şaban: "Ona görə ki, 2014-cü ildən neftin qiymətinin düşməsi belə bir zərurət yaratdı"
Asiya İnkişaf Bankının 50 illik yubileyinə təsadüf edən və "Asiyanın rifah və tərəqqisini birlikdə quraq" devizi altında 4-7 may tarixlərində Yaponiyanın Yokohama şəhərində keçirilən ADB-nin Rəhbərlər Şurasının İllik Toplantısı öz işini başa vurub. Toplantıda maliyyə naziri, bankın Rəhbərlər Şurasının üzvü Samir Şərifovun rəhbərlik etdiyi nümayəndə heyəti iştirak edib. Toplantıda çıxış edən S.Şərifov prezident İlham Əliyevin rəhbərliyi altında hökumət tərəfindən həyata keçirilən iqtisadi islahatlar barədə geniş məlumat verib.
AİB-nin prezidenti Azərbaycanın bankın dəyərli tərəfdaşı və vacib üzvü olduğunu, gələcəkdə bu əməkdaşlığı daha da genişləndirməyə maraq göstərdiklərini ifadə edib.
İllik Toplantı çərçivəsində, mayın 7-də "Cənub Qaz Dəhlizi" QSC və ADB arasında "Şahdəniz" qaz-kondensat yatağının işlənməsi layihəsinin dəstəklənməsi məqsədilə 500 mln. dollar məbləğində kreditin ayrılmasına dair müqavilə və Zəmanət sazişi imzalanıb.
İmzalanma mərasimində "Cənub Qaz Dəhlizi" layihəsinin strateji əhəmiyyəti bir daha vurğulanıb, AİB, Dünya Bankı, Asiya İnfrastruktur İnvestisiya Bankı və bir sıra digər beynəlxalq maliyyə institutları tərəfindən dəstəklənən bu transmilli layihənin Avropanın enerji təhlükəsizliyi və diversifikasiyası ilə yanaşı, region ölkələrinin sosial-iqtisadi inkişafında mühüm rol oynayacağı vurğulanıb. Bu layihənin uğurla başa çatdırılmasında AİB-nin dəstəyinin vacibliyi qeyd edilib.
Ümumilikdə, AİB-in bu məqsədlə yarım milyard dollar ayırması layihənin vaxtında reallaşdırılmasına nə kimi müsbət təsir göstərəcək?
Sözügedən məsələni "Bakı-Xəbər"ə şərh edən Neft Araşdırmaları Mərkəzinin rəhbəri İlham Şabanın sözlərinə görə, bu, layihənin vaxtında başa çatmasına öz müsbət təsirini göstərəcək: "Söhbət ondan gedir ki, Azərbaycanın Cənubi Qafqaz Boru Kəməri, TANAP və TAP-da olan paylarının maliyyələşdirilməsi ilə bağlı 2014-cü ilin fevralında Prezidentin imzaladığı sərəncamla "Cənub Qaz Dəhlizi" QSC yaradılıb. CQD-nin üzərinə vəzifə düşür ki, Azərbaycan tərəfinin maliyyə məsələlərini həll etsin. Sözügedən maliyyə məsələlərinin həll edilməsi çox vacib amil idi. Ona görə ki, 2014-cü ildən neftin qiymətinin düşməsi belə bir zərurət yaratdı. Məsələ ondadır ki, Neft Fondunun vəsaitlərini layihəyə yönəltsəydik, o zaman ehtiyatlar azalacaqdı. Ona görə də ən sərfəli variant kredit götürmək idi. Çünki bu layihələrin reallaşdırılması üçün Azərbaycan tərəfinin 12 milyard dollarlıq öhdəliyi var. O üzdən, qərara alındı ki, bu məqsədlə kredit götürülsün. Son iki ildə aparılan danışıqlar və bu layihələrin kommersiya baxımından uğurlu olmasını təsdiqləyən nəticələrin ortaya qoyulması göstərdi ki, xarici donorlar vəsait ayırmaqda maraqlıdır. Söhbət həm Dünya Bankından, həm də Avropa Yenidənqurma və İnkişaf Bankından, habelə Asiya İnkişaf Bankından gedir. Adıçəkilən banklar Azərbaycanın infrastruktur layihəsini, eyni zamanda, "Şahdəniz" layihəsini dəstəkləyir. Təbii ki, sözügedən maliyyə dəstəyi sayəsində Azərbaycan tərəfi heç bir sıxıntı olmadan öz öhdəliklərini yerinə yetirəcək. Bu da, öz növbəsində, layihənin vaxtında hazır olmasına gətirib çıxaracaq".
Vidadi ORDAHALLI
