“Bir TIR-da 300-400 manat əvəzinə 1300 manat xərcə düşürük”
“Sahibkarların üzləşdiyi əsas problemlərdən biri dəmir yolları vasitəsilə daşınma ilə əlaqədardır. “Azərbaycan Dəmir Yolları” QSC-nin parkı çox köhnəlib. Buna görə, xammalın ixracı zamanı şirkətlər problemlərlə üzləşir”. "APA-Economics" xəbər verir ki, bunu "Qeyri-neft ixracatçılarının respublika müşavirəsi"ndə Şərab İstehsalçıları və İxracatçıları Assosiasiyasının sədri Elçin Mədətov deyib.
O bildirib ki, Assosiasiyanın üzvü olan şirkətlər tərəfindən istehsal olunan məhsulların daşınması üçün “Azərbaycan Dəmir Yolları” QSC-nin parkında olan sisternalar olduqca azdır: “İxracatçılar da təsdiqləyər ki, onlar əllərində olan ixrac müqavilələrinin tələblərini yerinə yetirə bilmir. Ən böyük problem odur ki, sisternalar olmadığı üçün ümumiyyətlə müqavilə imzalanmayıb. Dəmir yolunda daşıma tarifləri məntiqə uyğun deyil. Çox maraqlıdır ki, dəmir yolunda daşınma avtomobil yolu ilə daşınmadan baha başa gəlir. Bizim xammal idxala bağlıdır. Məsələn, şüşə idxalımız Rusiyadan həyata keçirilir. Lakin hazırda Dağıstanda sürücülər tətil elan edib. Bunu nəzərə alaraq, biz “Azərbaycan Dəmir Yolları” QSC-yə müraciət etdik. 50 tonluq yükün Yalama-Biləcəri marşrutu üzrə 200 kilometrlik daşınması üçün 1300 manat, Yalama-Ləki-Ağdaş üzrə isə 1900 manat tələb olundu. Qeyd edim ki, 50 tonluq yükü iki ədəd TIR-la daşımaq mümkündür . 1 TIR-la daşınma 300-400 manata başa gəlir. Amma biz 1300 manat xərcə düşürük. Bilirik ki, dəmir yolu nəqliyyatında daşımanın tarifi İsveçrə frankının məzənnəsinə uyğun hesablanır. Başa düşürük ki, manat devalvasiyaya uğrayıb. Lakin daxili daşımalarda bu amil nəzərə alınmalıdır”.
Sahibkara cavab olaraq prezidentin iqtisadi islahatlar üzrə köməkçisi Natiq Əmirov isə bildirib ki, “Azərbaycan Dəmir Yolları” QSC ölkədaxili daşımalarda inhisarçı mövqeyə malikdir: “Bunu nəzərə alaraq, ölkədaxili daşımalarda tarif tənzimlənməsinə ehtiyac var. Daxili daşımalarda bu cür problemlər varsa, tariflərin dövlət tərəfindən tənzimlənməsinin tam hüquqi əsasları var. O ki qaldı dəmir yolu parkının yenilənməsinə, ölkə başçısının bununla bağlı müvafiq göstərişi var. Bütövlükdə nəqliyyat sektorunda daşımaların ən yüksək səviyyəyə qaldırılması üçün zəruri tədbirlər görülür. “Azərbaycan Dəmir Yolları” QSC parkın yenilənməsi istiqamətində müvafiq işlər görür, müxtəlif təyinatlı vaqonlar alır”.
“İnterGlass”ın şüşələri gətirilmə maldan baha çıxır
Yevlaxda keçirilən “Qeyri-neft ixracatçılarının respublika müşavirəsi”ndə bəzi sahibkarlar qablaşdırma sahəsindəki problemlərə toxunub. İş adamlarının əksəriyyəti şüşə məmulatlarının idxaldan asılılığına diqqət çəkib.
"Azərbaycanda iri şüşə məmulatların istehsalçısı fəaliyyət göstərir. Onlardan biri də “İnterGalss” şirkətidir. Amma həmin şirkətin istehsal etdiyi məhsullar idxal olunan məhsuldan bahadır. Bundan başqa, əsas problemlərdən biri də odur ki, “İnterGlass” və bu kimi şirkətlərin istehsal gücü aşağıdır”, - deyə sahibkarlardan biri qeyd edib.
Sahibkara cavab olaraq Azərbaycan Sahibkarlar Konfederasiyasının (ASK) prezidenti Məmməd Musayev bildirib ki, “İnterGlass” artıq ikinci istehsal xəttinin qurulmasına başlayıb. “Müvafiq avadanlıqlar alınıb. Həmin avadanlıqların quraşdırılması ilə bağlı üç ölkənin mütəxəssisləri ilə danışıqlar aparılır. Yaxın vaxtda ikinci xətt işə salınacaq. Bununla biz yaşıl şüşənin istehsalına start verəcəyik. Ekologiya və Təbii Sərvətlər Nazirliyindən aldığımız məlumata görə, ölkə ərazisindəki yataqlar araşdırılıb və məlum olub ki, yaşıl şüşə istehsalı üçün lazım olan qum Azərbaycanda var, ağ şüşə istehsalı üçün lazım olan qum ölkəmizdə yoxdur. Böyük ehtimalla, həmin qum Rusiyadan idxal olunacaq. Bundan başqa, biz şüşə istehsalı ilə bağlı ayrıca bir proqram hazırlamışıq. Bir məsələyə diqqət çəkmək istəyirəm ki, bu gün “İnterGlass”ın həyətində olan hazır şüşə materialları 3 aydır satılmır. Mən istərdim ki, bu məsələ sahibkarlarla müzakirə olunsun. Məhsulun satışında problem var”, - deyə ASK prezidenti qeyd edib.
Prezidentin iqtisadi islahatlar üzrə köməkçisi Natiq Əmirov isə ASK prezidentinə müraciət edərək bildirib ki, şirkətlər arasında kommunikasiyanın qurulmasında problemlər var: “Şirkətlərin internet saytları qeyri-işlək vəziyyətdədir. Məndə bəzən elə təsəvvür yaranır ki, sahibkarlar həyata keçirdiyi layihələr, istehsal etdiyi məhsullar barədə ancaq özləri xəbərdardır. Mən tez-tez şirkətlərin saytlarını izləyirəm. Elə şirkət var ki, saytını sonuncu dəfə 3 il bundan öncə yeniləyib. Tutalım, bu gün bir şirkət məhsul idxal edir, amma həmin məhsulu başqa bir yerli şirkət ölkəmizdə istehsal edir və bunların bir-birindən xəbəri yoxdur. Kommunikasiya düzgün qurulmalıdır. Müştərilər şirkətlərin saytına daxil olan zaman istehsal olunan məhsullar barədə ətraflı məlumat almaq imkanını qazanmalıdır. Şirkətlər saytlarını aktiv şəkildə idarə etməlidir. Biznes bu cür qurulur”.
ASK prezidenti N. Əmirovun iradı ilə razılaşıb: “Məsələ çox düzgün qaldırılıb. Kommunikasiyada ciddi boşluqlar var. Bu problem aradan qaldırmağa çalışacağıq”.
Gömrük laboratoriyası Zaqatalada tikilsə nə olar ki…
Fındıq İstehsalçıları Assosiasiyası Dövlət Gömrük Komitəsinə (DGK) müraciət edərək Zaqatalada gömrük və fitosanitar laboratoriyasının tikilməsini xahiş edib. “APA-Economics” xəbər verir ki, müvafiq müraciət Yevlaxda keçirilən “Qeyri-neft ixracatçılarının respublika müşavirəsi”ndə Assosiasiyanın sədri İsmayıl Orucov tərəfindən səsləndirilib.
“Bilirsiniz ki, fındıq ixracı ilə məşğul olan müəssisələrin mütləq əksəriyyəti təxminən 90-95%-i Zaqatalada fəaliyyət göstərir. Bu baxımdan gömrük və fitosanitar laboratoriyaların məhz Zaqatalada tikintisi daha məqsədəuyğundur. Biz hətta Assosiasiyanın binasında laboratoriya üçün yer ayırmağa da hazırıq”, - deyə İ. Orucov bildirib.
Bundan başqa, o bildirib ki, gömrük keçid məntəqələrinin şənbə-bazar günləri işləməsi ixracatçıların işlərini daha da asanlaşdırar: “Münbit şərait nəticəsində bu il məhsuldarlıq 50% artacaq. Bu məhsul əsasən sentyabr-dekabr aylarında ixrac olunur. Biz komitənin rəhbərliyindən xahiş edirik ki, gömrük keçid məntəqələri şənbə-bazar günləri də fəaliyyət göstərsin. İxrac olunan mala Yeni il bayramı öncəsi tələbat çox olur. Qeyd edilən məsələ həllini tapsa, məhsul daha tez ixrac olunar”.
DGK sədrinin müavini Səfər Mehdiyev isə qaldırılan məsələlərə cavab olaraq bildirib ki, onun təmsil etdiyi qurum da laboratoriyanın məhz qeyd edilən regionda tikilməsinin lehinədir: "Bizim də araşdırmalarımız göstərir ki, fındıq ixracatçılarının mütləq əksəriyyəti məhz bu regionda cəmləşib. Bunu nəzərə alaraq, biz həmin regionda laboratoriya təsis etmək istəyirik. Artıq Balakəndə laboratoriyanın tikintisinə dair müvafiq şirkətlə müqavilə imzalanıb. Amma sizing müraciət araşdırılacaq və sizə rəsmi cavab veriləcək. Əgər siz laboratoriya üçün yer ayırmağa hazırsınızsa, biz buna yalnız müsbət baxırıq. Bu üsulla biz həm də büdcə vəsaitlərinə qənaət etmiş olarıq. O ki qaldı ikinci məsələyə, biz ixracatçılar üçün mobil qruplar yaratmışıq. Həmin mobil qruplar ixrac nümunələrinin götürülməsi və sair vacib məsələlərlə bağlı ixracatçılara yardım edir. Əsas problem ondan ibarətdir ki, şənbə-bazar günləri bizim elektron bəyannamə sistemində Mərkəzi Bankın məzənnəsi əks olunmur. Bilirsiniz ki, həmin sistemə bir neçə dövlət qurumu uzlaşdırılıb ki, onlardan biri də Mərkəzi Bankdır. Qeyd etdiyim məsələ ilə əlaqədar elektron bəyannamələrin qeydiyyatını apara bilmirik. Mən söz verirəm ki, bununla bağlı Mərkəzi Banka müraciət olunacaq və problemin aradan qaldırılmasına çalışacağıq”.
Prezidentin iqtisadi islahatlar üzrə köməkçisi Natiq Əmirov da bildirib ki, qaldırılan məsələlər nəzarətə götürüləcək: “Biz qeyd edilən problemlərin aradan qaldırılması üçün Mərkəzi Banka müraciət edəcəyik. Çalışacağıq ki, məsələ tez bir zamanda həllini tapsın”.
