Rəsul Cahangirli: "Bu sistemin mahiyyəti ölkələrin hamısında eynidir"
Aprelin 10-dan mayın 10-dək Azərbaycan paytaxtında ilk dəfə keçiriləcək ticarət festivalı - "Bakı Şoppinq Festivalı" günlərində 100 manat və daha çox alış-veriş edən hər bir əcnəbi və ya Azərbaycan vətəndaşı "Tax free" (əlavə dəyər vergisinin qaytarılması) sistemindən yararlana biləcək.
Bunu mədəniyyət və turizm naziri Əbülfəs Qarayev deyib.
Nazir qeyd edib ki, "Bakı Şoppinq Festivalı" nəinki xaricdən turist axınını təşkil etmək, eyni zamanda, daxili turizmi inkişaf etdirmək məqsədi daşıyır. Festival çərçivəsində əcnəbilərlə yanaşı, Azərbaycan vətəndaşları da "Tax free" (əlavə dəyər vergisinin qaytarılması) sistemindən istifadə edə biləcək ki, bu da dünya təcrübəsində bir ilkdir.
Ə.Qarayevin sözlərinə görə, festivala bir sıra qonşu ölkələrdə, eləcə də son dövrlər Azərbaycana böyük turist axınının müşahidə olunduğu Fars körfəzi ölkələrində maraq var.
Nazir əlavə edib ki, bu festival Qafqazda və Orta Asiyada ilk belə təcrübə kimi tarixə yazılacaq. O qeyd edib ki, Dünya Turizm Təşkilatının hesablamalarına görə, ticarət festivalları turist axınını 30 faizədək artırır. Ticarət turistlərin xərcləri sırasında əsas kateqoriyaya çevrilir, nəticə etibarilə, birbaşa və iqtisadiyyatın digər sektorları ilə əlaqədə olaraq iqtisadiyyatın vacib gəlir mənbəyinə çevrilir.
Ümumən bunu ekspertlər necə dəyərləndirir?
Məsələyə münasibət bildirən ekspert Rəsul Cahangirlinin sözlərinə görə, Azərbaycan vətəndaşlarının da "Tax free" sistemindən istifadə etməsi daxili turizmi stimullaşdıracaq: "Düzdür, Azərbaycan vətəndaşları bundan 1 ay yararlanacaq. Yəni bunun müddəti məhdud xarakter daşıyır. Ancaq buna baxmayaraq, bu, daxili turizmə müsbət təsir göstərəcək. Adətən "Tax free" sisteminin tətbiq edilməsinin məqsədi əcnəbilərin Azərbaycanda mal və məhsullar almasının təşkil və təşviq edilməsi, turistlərin cəlb edilməsi və əmtəə dövriyyəsinin artırılmasıdır. "Tax free" ölkəmizə gələn turistlərin daha çox alış-veriş etməsini təşviq edəcək. Bu sistem hazırda dünyanın əksər ölkələrində işləyir və xarici təcrübədə müsbət nümunələri var. "Tax free" sistemi hazırda 50-dən artıq ölkədə işləyir. Dünyanın digər regionları ilə müqayisədə bu sistem daha çox Avropada yayılıb. "Tax free" sisteminin mahiyyəti ölkələrin hamısında eynidir".
Vidadi ORDAHALLI
