Əkrəm Həsənov: "Vergi Məcəlləsinə əsasən, fərdi sahibkarlar və hüquqi şəxslər bank hesabından nağd pul çıxarırsa, bank 1 faizlik vergi tutmalıdır"
Məlum olduğu kimi, Azərbaycan Mərkəzi Bankı (AMB) martın 17-də ölkədə fəaliyyət göstərən banklara məktub göndərib. Bu barədə "APA-Economics"ə bank sektorundakı mənbələr xəbər verib.
Bildirilir ki, AMB banklara internet bankinq vasitəsilə hüquqi şəxslərin fiziki şəxslərə köçürmə əməliyyatlarını məhdudlaşdırmağı tapşırıb: "Hüquqi şəxslərdən nağdlaşdırma zamanı 1 %-lik vergi tutulur. Beləliklə, hüquqi şəxslər fiziki şəxslərin hesabına köçürmə edərək vergidən yayına bilir. Mərkəzi Bankın bu addımı məhz vergidən yayınmanın qarşısını almağa hesablanıb", - deyə həmsöhbətimiz qeyd edib.
Xatırladaq ki, Milli Məclisin 2016-cı il dekabrın 16-da qəbul etdiyi "Nağdsız hesablaşmalar haqqında" Qanuna görə, banklardan nağd pul vəsaitlərinin çıxarılmasının məhdudlaşdırılması məqsədilə hüquqi şəxslər və fərdi sahibkarlar tərəfindən pul vəsaitlərinin nağd qaydada bank hesablarından çıxarılmasına görə banklar və poçt rabitəsinin milli operatorları tərəfindən 1 % dərəcəsi ilə sadələşdirilmiş vergi tutulur.
Məsələyə münasibət bildirən bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, belə bir məktubun olmasına şübhə ilə yanaşır: "Bəllidir ki, artıq bir ildir Mərkəzi Bankın bank nəzarəti səlahiyyəti yoxdur. Bu səlahiyyət Maliyyə Bazarlarına Nəzarət Palatasına verilib. Söhbət bank hesablarından pul çıxarılmasından gedirsə, Mərkəzi Bank qədər vergidən yayınmaya yol verən başqa bir qurum yoxdur. Bəllidir ki, hər bir bankın bank hesabları var. Qanunvericiliyə əsasən, bütün bankların milli valyutada olan bank hesabları məhz Mərkəzi Bankdadır. Banklar pullarını nağd şəkildə Mərkəzi Bankdan çıxarır. Mərkəzi Bank həmin banklardan 1 faizlik vergi tutmur. Beləliklə, adıçəkilən qurum Vergi Məcəlləsini pozur. Xatırladım ki, Vergi Məcəlləsində qeyd olunur ki, fərdi sahibkarlar və hüquqi şəxslər bank hesabından nağd pul çıxarırsa, bank 1 faizlik vergi tutmalıdır".
Günel CƏLİLOVA
