Vüqar Bayramov: "Real sektorun maliyyələşdirilməsi banklar üçün prioritet olmalı, ancaq istehlak kreditləşməsinə də xüsusi diqqət ayrılmalıdır"
Azərbaycanda bütün maliyyə kredit təşkilatları tərəfindən ev təsərrüfatlarına verilən kreditlərin məcmu kredit portfelində xüsusi çəkisi 5 illik minimuma enib. Bu barədə Azərbaycan Mərkəzi Bankının yaydığı məlumatda qeyd olunur.
Hesabata əsasən, bu kreditlərin cəmi kreditlərdə xüsusi çəkisi 2017-ci il fevralın 1-nə 34,8 % (5 814,0 mln. manat) təşkil edib. Qeyd edək ki, bu göstərici 2012-ci ildə 35,3 % (4 316,7 mln. manat), 2011-ci ildə 33,7 % (3 315,0 mln. manat) olub, 2014-cü ildə isə 44 %-ə (7 731,8 mln. manat) yüksəlib.
Qeyd edək ki, cari il fevralın 1-nə cəmi kredit portfelinin həcmi 16 705,2 mln. manat təşkil edib, bunun da 9,8 %-nin və ya 1 633,1 mln. manatının ödəniş vaxtı keçib.
Azərbaycanda istehlak kreditləşməsinin 5 illik minimuma enməsinə münasibət bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, istehlak kreditlərinin verilməsi ilə bağlı şərtlər sərtləşdirilib: "Həmçinin, devalvasiyadan sonra kredit götürən şəxslər azalıb. Kreditlərin həcminin azalması birbaşa bank sektorunda aparılan islahatlarla bağlıdır. Güman olunur ki, bu vəziyyət istehlak kreditlərində də özünü göstərəcək".
Həmsöhbətimizin sözlərinə görə, hökumət çalışır ki, banklar real sektoru maliyyələşdirsin. Real sektorun maliyyələşdirilməsi banklar üçün prioritet olmalıdır. Ancaq istehlak kreditləşməsi də vacibdir. İstehlak kreditlərinin şərtləri əlçatan olmalıdır ki, buna müraciət edənlərin sayı az olmasın: "Banklar ödəmə qabiliyyətini yoxlamaq şərtilə istehlak kreditinin verilməsini asanlaşdırmalıdır. Banklar istehlak kreditlərini sığorta etdirməlidir ki, kreditlərə çıxış imkanı əldə etsin. Onlar nə qədər çox kredit verərsə, fəaliyyətini bir o qədər genişləndirər. Bu baxımdan istehlak kreditləşməsinin 5 illik minimuma enməsi birbaşa kreditə çıxış imkanının məhdudlaşması ilə bağlıdır".
Günel CƏLİLOVA
