Eyyub Hüseynov: "... məhsulların açıq şəkildə satılmasının qarşısını alacaq"
Ölkədə fəaliyyət göstərən qabaqcıl qablaşdırma məhsulları istehsalçıları və ixracatçılarının təşəbbüsü, Azərbaycan İqtisadiyyat Nazirliyinin və AR Sahibkarlar (İşəgötürənlər) Təşkilatları Milli Konfederasiyasının dəstəyi ilə Azərbaycan Qablaşdırma Sənayesi Assosiasiyası təsis olunub.
İqtisadiyyat nazirinin müavini Sahib Məmmədov Bakı Biznes Mərkəzində keçirilmiş tədbirdə çıxış edərək bildirib ki, sahibkarlığın inkişafı, əlverişli biznes mühitinin yaradılması Azərbaycan Prezidentinin rəhbərliyi ilə həyata keçirilən uğurlu iqtisadi siyasətin prioritet istiqamətidir. O qeyd edib ki, ölkə başçısının qablaşdırma istehsalının ölkədə təşkili və bu sahədə idxaldan asılılığın aradan qaldırılması ilə bağlı tapşırığına uyğun olaraq, qablaşdırma məhsullarının istehsalı və ixracı ilə məşğul olan sahibkarların fəaliyyətini əlaqələndirmək və onların qarşılaşdığı problemlərin həlli məqsədilə yaradılacaq assosiasiyanın fəaliyyəti də sahibkarlığın inkişafı, eləcə də qablaşdırma istehsalının artırılması, ölkənin ixrac imkanlarının genişləndirilməsi baxımından əhəmiyyətli olacaq. İqtisadiyyat Nazirliyi tərəfindən assosiasiyanın fəaliyyətinin təşkilinə lazımi dəstək göstəriləcək.
S.Məmmədovun dediynə görə, hazırda Azərbaycan bazarında qablaşdırma sahəsində boşluq var: "Bu sahədə idxaldan asılı vəziyyətdəyik. Adıçəkilən sahədə özümüzü tam təmin edə bilmirik. Qablaşdırma ilə bağlı bəzən idxaldan da asılı oluruq. Biz gərək birlikdə bu sahəyə diqqət yetirək ki, ölkə başçısının qarşımıza qoyduğu hədəflərə nail olaq. Hesab edirəm ki, Qablaşdırma Sənayesi Assosiasiyasının yaradılması bu sahənin inkişafında rol oynayacaq".
Qablaşdırma Sənayesi Assosiasiyasının yaradılmasına münasibət bildirən Azad İstehlakçılar Birliyinin rəhbəri Eyyub Hüseynov "Bakı-Xəbər"ə açıqlamasında qeyd etdi ki, Azərbaycanın qablaşdırılma sahəsi ilə bağlı problemi var idi: "Bu gün market və bazarlarda açıq şəkildə istənilən məhsulun satışını müşahidə elə bilərik. Məhsulların açıq şəkildə satılması Nazirlər Kabinetinin qərarının pozulmasıdır. Həmçinin, onu da deyim ki, bəzi mağazalar vaxtı keçmiş konfet və ya şirniyyat məhsullarını sellofana dolduraraq satışa çıxarır. Bu da istehlakçı hüquqlarının pozulması deməkdir. Belə bir qurumun yaradılması məhsulların açıq şəkildə satılmasının qarşısını alacaq".
Həmsöhbətimiz hesab edir ki, Qablaşdırma Sənayesi Assosiasiyasının yaradılması ilə Azərbaycan brendi dünyaya sərbəst şəkildə tanıdılacaq. Qablaşdırılan məhsullar Azərbaycan brendini dünyada tanıdacaq.
Günel CƏLİLOVA
