Rəşad Həsənov: "Azad ticarət zonası və "Cənub Qaz Dəhlizi" kimi iri layihələr istiqamətində zəruri olan xərclərin icrasının həyata keçirilməsi nəticəsində kapital qoyuluşunda artımlar hiss olunur"
2017-ci ilin yanvar-fevral aylarında Azərbaycan iqtisadiyyatına kapital qoyuluşları 2 mlrd. 93,7 mln. manat təşkil edib ki, bu da ötən ilin analoji dövrünün göstəricisindən 5,7 faiz çoxdur.
Bu barədə Dövlət Statistika Komitəsindən məlumat verilib. Komitənin məlumatına əsasən, yanvar-fevral aylarında kapital qoyuluşlarının ümumi həcmindən 1 mlrd. 868,3 mln. manat (bütün investisiyaların 89,2 %-i) istehsalat təyinatlı obyektlərin, 69,3 mln. manat (bütün investisiyaların 8,1 %-i) xidmət obyektlərinin, 56,1 mln. manat yaşayış sahələrinin inşasına (bütün investisiyaların 2,7 %-i) yönəldilib.
Hesabat dövrü ərzində 1 mlrd. 405,7 mln. manat (bütün investisiyaların 67,1 %-i) xarici investisiyaların, 688 mln. manat (bütün investisiyaların 32,9 %-i) daxili investisiyaların payına düşüb.
Yanvar-fevral aylarında əsas kapitala dövlət investisiyalarının həcmi 531,8 mln. manat (bütün investisiyaların 25,4 %-i), özəl investisiyaların həcmi 1 mlrd. 561,9 mln. manat (bütün investisiyaların 74,6 %-i) təşkil edib.
İqtisadçı-ekspert Rəşad Həsənov "Bakı-Xəbər"ə açıqlamasında cari ilin yanvar-fevral ayları ərzində ölkə iqtisadiyyatına kapital qoyuluşunun 6 faiz artmasının gözlənilən olduğunu bildirdi. Onun sözlərinə görə, 2016-cı il iqtisadiyyat üçün ən risqli illərdən biri idi: "Bu baxımdan daxili və xarici investorlar tərəfindən kapital qoyuluşu maksimum səviyyədə məhdudlaşdırılmışdı. Bəllidir ki, hazırda manatın məzənnəsində orta mövqe müəyyənləşib. Hökumətin rəsmi şəkildə "üzən valyuta rejimi" ilə bağlı bəyanat səsləndirməsi və bununla bağlı müəyyən addımlar atması sahibkarları ruhlandırdı. Əsasən azad ticarət zonası və "Cənub Qaz Dəhlizi" kimi iri layihələr istiqamətində zəruri olan xərclərin icrasının həyata keçirilməsi nəticəsində kapital qoyuluşunda artımlar hiss olunur. Ölkə iqtisadiyyatına yatırılan kapital qoyuluşu gələcək aylarda daha da arta bilər".
Günel CƏLİLOVA
