Əkrəm Həsənov: "Kiçikhəcmli depozitlərin banklardan çıxarılması səbəblərindən biri də əhalinin banklara inamının azalmasıdır"
Azərbaycanda 2016-cı ilin ilk rübündə bank depozitlərinin ümumi həcmində azalma müşahidə olunsa da, sonrakı üç rüb ərzində yalnız orta və iri məbləğli depozitlərin həcmi artıb. Maliyyə Bazarlarına Nəzarət Palatasına (MNBP) istinadən xəbərə görə, bu barədə Palatanın şöbə müdiri Rüstəm Tahirov "Fitch" beynəlxalq reytinq agentliyinin Bakıda keçirilən VI illik konfransında çıxışı zamanı bildirib.
Şöbə müdirinin verdiyi məlumata görə, Azərbaycanda 2016-cı ilin ilk rübündə 50 min manatadək olan depozitlər 361 mln. manat, 50-500 min manatlıq depozitlər 345 mln. manat, 500 mindən artıq olan iri depozitlər isə 400 mln. manat azalıb. Ötən ilin qalan hissəsində isə bu depozitlər üzrə müvafiq olaraq 219 mln. manat azalma, 195 mln. və 99 mln. manat artım müşahidə olunub.
R.Tahirov qeyd edib ki, fərdi depozitlər azalma göstərdiyi halda, korporativ depozitlər artaraq azalmanı kompensasiya edib. Həmçinin, əmanətlərin dövlət tərəfindən tam həcmdə sığortalanması bank sistemindən depozitlərin çıxarılmasını 3 dəfə azaldıb.
Kiçikhəcmli depozitlərin bankdan çıxarılmasına münasibət bildirən bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, banklar böyük məbləğdə olan depoziti əmanətçiyə qaytarmır: "İri bankların biri 6 aydan çoxdur xarici vətəndaşın iri məbləğdə yerləşdirdiyi depoziti qaytarmır. Mən bu vəziyyətlə bağlı həmin bankı məhkəməyə verdim. Məhkəmədə mən qalib olsam da, bank hələ də həmin vətəndaşın pulunu vermir. Səbəb kimi bankda pulun olmadığını bildirir. Vəziyyətlə bağlı Maliyyə Bazarlarına Nəzarət Palatasına da müraciət etmişəm.
Mən sizə deyim ki, bu kimi hallar bu gün çox yaşanır. Banklar iri məbləğdə yerləşdirilən əmanətləri geri qaytarmır. Belə olan halda, vətəndaşlar əmanətlərini hissə-hissə çıxarır".
Həmsöhbətimiz onu da əlavə etdi ki, kiçikhəcmli depozitlərin banklardan çıxarılması səbəblərindən biri də əhalinin banklara inamının azalmasıdır.
Günel CƏLİLOVA
