Aydın Hüseynov: "İslahatların nəticəsi artıq özünü göstərməkdədir"
Azərbaycan Prezidenti İlham Əliyev V Qlobal Bakı Forumunun açılışında bildirib ki, bu il ölkəmizdə iqtisadi artım olacaq. O deyib ki, Azərbaycanda yoxsulluq son 15 ildə 5 faizə qədər azalıb.
Ölkə iqtisadiyyatı neftin ucuzlaşmasından əziyyət çəksə də, islahatlarla qısa müddətdə çətinliklər həll edilib: "Bütün çətinliklərə baxmayaraq, Azərbaycan inkişaf edir, iqtisadi göstəricilərimiz artır, geniş regional inkişaf proqramları icra olunur, işsizlik və yoxsulluq dəfələrlə aşağı salınıb. Ölkəmizin regional və beynəlxalq mövqeləri çox güclüdür, həm qonşularla, həm də Avropa İttifaqına üzv ölkələrlə yaxşı əməkdaşlıq əlaqələri qurulub. Neft gəlirləri 3-4 dəfə aşağı düşürsə, bu, həyat tərzinə təsir edir. Buna baxmayaraq, çətinliklərin öhdəsindən gəldik. Müəyyən çətinliklər var, ancaq neft qiymətlərinə adaptasiya baş verir. Bu il iqtisadi artım olacaq. Hətta keçən il neft və qaz sahəsini kənara qoysaq, görərik ki, qeyri-neft sektorunda artım var. Son iki ay ərzində qeyri-neft məhsullarının ixracını iki dəfəyə qədər artıra bilmişik. Biz ixracımızı genişləndirməliyik, bizə xarici bazarlar lazımdır. Bunun üçün həmin bazarlara malik ölkələrin rəhbərləri ilə yaxşı siyasi əlaqələrə malik olmalıyıq".
Ümumilikdə, bu il ölkədə gözlənilən iqtisadi artımı ekspertlər necə şərh edir?
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Hüseynovun sözlərinə görə, bu il iqtisadi artımın olacağını şərtləndirən bir sıra amillər var: "Son dövrlərə qədər iqtisadiyyatımız neft amili üzərində qurulmuşdusa, artıq əks proses gedir. 2016-cı ilin əvvəlindən cənab prezident İlham Əliyev iqtisadi strategiyanı müəyyənləşdirdi ki, ölkə iqtisadiyyatının neft sektorundan asılılığı minimuma endirilməlidir. Bu təkcə söz olaraq deyilməyib. Praktiki olaraq bu istiqamətdə ciddi işlər həyata keçirilir. Sözügedən məsələ ilə əlaqədər prezident bir sıra fərman və sərəncamlar imzalayıb. Qanunvericilik bazasının təkminləşdirilməsi ilə əlaqədar sistemli işlər görülüb. Ümumilikdə böyük islahatlar, struktur dəyişiklikləri aparıldı. Vergi, gömrük sistemində və ümumiyyətlə iqtisadiyyatın bütün sahələrində çox böyük islahatlar aparıldı. Sözügedən islahatların nəticəsi artıq özünü göstərməkdədir. Büdcənin gəlir hissəsinin ilkin olaraq proqnozlaşdırılmış rəqəmləri artıq onu göstərir ki, doğurdan da bu ili biz iqtisadi artımla başa vuracağıq".
Vidadi ORDAHALLI
