Pərviz Heydərov: "Ölkədə ÜDM istehsalında əvvəlki ilin eyni dövrü ilə müqayisədə 0,4 faiz artımın qeydə alınması müsbət və eyni zamanda təbii haldır"
2017-ci ilin yanvar-fevral aylarında ölkədə ümumi daxili məhsul istehsalı əvvəlki ilin eyni dövrü ilə müqayisədə 0,4 faiz artaraq 10042,6 milyon manat təşkil edib. Əhalinin hər nəfərinə düşən ÜDM 1035,6 manata bərabər olub. Dövlət Statistika Komitəsi bu barədə xəbər yayıb.
Ümumi daxili məhsulun 46,7 faizi sənayedə, 9,6 faizi ticarət; nəqliyyat vasitələrinin təmiri sahələrində, 7,6 faizi tikintidə, 6,7 faizi nəqliyyat və anbar təsərrüfatı, 2,7 faizi kənd təsərrüfatı, meşə təsərrüfatı və balıqçılıq, 2,7 faizi turistlərin yerləşdirilməsi və ictimai iaşə, 1,7 faizi informasiya və rabitə sahələrində, 15,8 faizi isə digər sahələrdə istehsal edilib. Məhsula və idxala xalis vergilər ÜDM-in 6,5 faizini təşkil edib.
Bu dövrdə iqtisadiyyatın qeyri-neft bölməsində istehsal olunmuş əlavə dəyər əvvəlki ilin müvafiq dövrünə nisbətən 2,3 faiz artıb, onun ÜDM-də xüsusi çəkisi 56,8 faiz olub.
Ümumi daxili məhsul istehsalının həcminin ötən illərlə müqayisədə artmasına münasibət bildirən İqtisadiyyat Nazirliyi İqtisadi İslahatlar Elmi Tədqiqat İnstitunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, cari ilin yanvar-fevral aylarında ölkədə ÜDM istehsalında əvvəlki ilin eyni dövrü ilə müqayisədə 0,4 faiz artımın qeydə alınması müsbət və eyni zamanda təbii haldır: "Məlumdur ki, keçən il və ondan əvvəlki ildə iqtisadi tənəzzül var idi. Lakin bu il bunun dayanacağı proqnozlaşdırılmışdı. Bu da keçən il iqtisadiyyatın idarə olunmasında dəyişikliklərlə əlaqadər irəli sürülürdü. Qeyri-neft sektoru sahələrinə əlavə dəstəyin verilməsi, ixracın stimullaşdırılması tədbirləri və sair bu prosesi təmin etməli idi. Məsələn, hökumətin 2017-ci ildə ölkədə ÜDM-in real artımının 1,0 faiz olmaqla 61,4 milyard manat təşkil edəcəyi barədə irəli sürdüyü proqnoz heç də təsadüfi deyil. Qeyri-neft sektorumuzda cüzi canlanma işartıları nəzərə çarpmaqdadır. Ticarət, əvvəlki illərdəkindən fərqli olaraq, durğunluqdan çıxmış vəziyyətdədir. Xidmət sektorunda hərəkətlilik yaranıb. Ölkəyə turist axını var. Kənd təsərrüfatında canlanma müşahidə edilməkdədir. Düzdür, bunlar hələ çox kövrək xarakter daşıyır. Lakin tendensiyanın ardıcıl xarakter halını alacağı real görünür. Ümumiyyətlə, hesab edirəm ki, 1-ci rübün nəticələri çox şeyi göstərəcək".
Günel CƏLİLOVA
