Zakir Əhmədov: "...Azərbaycanın şansları daha böyükdür"
Son illərdə Azərbaycan-Fransa əlaqələri daha da inkişaf edib, ikitərəfli münasibətlərdə qarşılıqlı inam və etimad güclənib. Fransa Azərbaycanın Avropanın enerji təhlükəsizliyində oynadığı rolu müsbət qiymətləndirərək energetika sahəsində əməkdaşlığı genişləndirmək niyyətində olduğunu bəyan edib.
Azərbaycan və Fransa arasında əməkdaşlıq münasibətləri hazırda yeni inkişaf mərhələsinə qədəm qoyub. Dövlət və hökumət başçılarının qarşılıqlı səfərləri ölkələr arasında münasibətlərin ildən-ilə güclənməsinə mühüm təsir göstərib. Prezident İlham Əliyevin Fransaya budəfəki səfəri də, şübhəsiz ki, ikitərəfli əlaqələrin inkişafında yeni imkanlar açacaq.
Fransanın Cənubi Qafqazda əsas ticarət tərəfdaşı olan Azərbaycanla telekommunikasiya, şəhərsalma, nəqliyyat, yüngül sənaye, şərabçılıq və digər sahələrdə əməkdaşlığı getdikcə möhkəmlənir. Hazırda ölkədə 50-dən çox fransız şirkəti fəaliyyət göstərir və ticarət dövriyyəsi iki milyard dollara yaxınlaşır. Fransız müəssisələri neft və neft məhsullarının istehsalı ilə yanaşı, bank, elektrik enerjisi və ətraf mühitin qorunması və istehlak malları sektorlarında fəaliyyət göstərir.
Prezident İlham Əliyev səfər çərçivəsində işgüzar dairələrlə keçirdiyi görüşlər zamanı Fransa şirkətlərini Azərbaycana sərmayə qoymağa çağırıb: "Xarici və yerli şirkətlərin bütün investisiyaları lazımi şəkildə qorunur. Buna görə də, bu, Azərbaycana investisiya yatırmaq üçün əlavə stimul və maraq yaradır. Eyni zamanda, regionda güclü iqtisadi mövqeyə, qonşularla yaxşı əlaqələrə və güclü maliyyə ehtiyatlarına malik olaraq biz strateji əhəmiyyət kəsb etdiyini düşündüyümüz sektorlara podratçılar cəlb edə bilərik".
İlham Əliyevdən əvvəl Ermənistan prezidenti Serj Sarkisyan Fransada olmuşdu. O da fransız şirkətlərini ölkəyə sərmayə qoymağa çağırmışdı. Bütövlükdə investisiya cəlb etmək etmək baxımından hansı dövlət daha cəlbedicidir - Azərbaycan, yoxsa Ermənistan?
Məsələyə münasibət bildirən ekspert Zakir Əhmədovun sözlərinə görə, Azərbaycan bu baxımdan daha cəlbedicidir: "Ermənistanın Fransa şirkətləri üçün cəlbedici olmasından söhbət gedə bilməz. Baxmayaraq ki, sözügedən dövlətlərin münasibətləri çox yaxındır. Ancaq sərmayənin ölkəyə cəlb olunması üçün gərək həm də ciddi iqtisadi faktorlar olsun. Ermənistan iqtisadiyyatı bərbad vəziyyətdədir və hər keçən gün bir az da geriləyir. Ölkə əhalisi ilbəil azalır. Nəzərə alsaq ki, Ermənistanı tərk edənlərin əsas hissəsini əmək qabiliyyətli şəxslər təşkil edir, o baxımdan bunun nə demək olduğunu təsəvvür etmək heç də çətin deyil. Ermənistan bazarı çox kiçikdir. Belə olan halda, təbii ki, fransız şirkətlərinin ora investisiya qoyacaqları real görünmür. Ancaq bundan fərqli olaraq, Azərbaycanın şansları daha böyükdür. Ona görə ki, Azərbaycanda yaxşı nəqliyyat infrastrukturu var. Son illər ölkə iqtisadiyyatı şaxələndirilir. Bu da xarici şirkətlər üçün yeni perspektivlər açır".
Vidadi ORDAHALLI
