Aytəkin Kamranqızı: "Amerika KİV-nin apardığı araşdırma nəticəsində ölkəmizin dünyanın ən yaxşı ölkələri siyahısında yer alması sevindiricidir"
Amerikanın "US Nyus-Vorld Report" jurnalının versiyasına görə, Azərbaycan dünyanın ən yaxşı ölkələrinin siyahısında 69-cu yeri tutub. BBC xəbər verir ki, Azərbaycanın macəra (69), vətəndaşlıq (61), mədəni təsir (75), sahibkarlıq (67), miras (70), liderlər (41), biznes açıqlığı (66), güc (47) və həyat keyfiyyəti (65) üzrə reytinqləri açıqlanıb.
Reytinq siyahısında ümumilikdə 80 ölkənin vəziyyətinə baxılıb.
Siyahıya İsveçrə başçılıq edir. Ölkələr 9 meyar üzrə qiymətləndirilib. Turizmin və sosial sahənin inkişafı, iqtisadi artım, əhalinin yaşayış səviyyəsi və dünya arenasına təsir də meyarlar arasında olub.
Tədqiqat müəlliflərinin sözlərinə görə, artıq ikinci ildir ABŞ, Rusiya, Çin, Böyük Britaniya və Almaniya bu meyar üzrə böyük fərqlə liderlik edir.
Amerikanın "US Nyus-Vorld Report" jurnalının versiyasına görə, Azərbaycanın dünyanın ən yaxşı ölkələrinin siyahısında yer alması ekspertlər tərəfindən müsbət qarşılanır. Onların fikrincə, son zamanlar ölkənin sosial-iqtisadi inkişafı, həmçinin, turizmin inkişafı istiqamətində atılan addımlar beynəlxalq medianın da diqqət mərkəzindədir.
Sosioloq Aytəkin Kamranqızı bizimlə söhbətində bildirdi ki, Azərbaycanın dünyanın ən yaxşı ölkələri siyahısında yer alması gözlənilən idi: "Amerika KİV-nin apardığı araşdırma nəticəsində ölkəmizin dünyanın ən yaxşı ölkələrinin siyahısında 69-cu yeri tutması sevindiricidir. Həmin siyahıda inkişaf etmiş ölkələr var. Həmin ölkələrlə Azərbaycanın müqayisə olunması və 69-cu yeri tutması bizim uğurumuzdur".
Həmsöhbətimizin sözlərinə görə, son illər ölkənin infrastrukturunun dəyişməsi, iqtisadi, sosial və turizm sahəsinin inkişafı xaricilərin diqqətindən yayınmır: "Keçirilən beynəlxalq əhəmiyyətli tədbirlər nəticəsində ölkəmizin imici dünya ölkələri arasında yüksəldi. Həmin tədbirlər sayəsində ölkəmizə gələn turistlər Azərbaycanın necə inkişaf etdiyini canlı şəkildə gördülər. Təbii ki, onlar öz ölkələrinə geri qayıdanda bu inkişafı həmvətənlərinə danışıb".
A.Kamranqızı onu da bildirdi ki, Azərbaycan mədəniyyəti hər zaman əcnəbilərin marağında olub.
Sosioloq ümid edir ki, yaxın gələcəkdə Azərbaycanın adı reytinqlərdə ön sırada yer alar.
Günel CƏLİLOVA
