İbrahim Kərbəlayev: "Çağrı mərkəzi"nə daxil olan şikayətlərlə bağlı əməkdaşlar tərəfindən yerindəcə baxılıb tənzimlənmə işləri aparılır"
Vahid Əhmədov: "Hesab edirəm ki, "Azəriqaz"ın özəlləşdirilməsinin vaxtı gəlib çatıb"
Son zamanlar paytaxtın müxtəlif ünvanlarından qazın kəsilməsi və ya qazın təzyiqinin zəif olması ilə bağlı redaksiyamıza müraciətlər daxil olur. Redaksiyamıza müraciət edən oxucular qazın tez-tez kəsilməsindən və ya qazın verilişinin zəif olmasından şikayət edir.
Qaz təminatı ilə bağlı şikayətlərə ən çox sosial şəbəkələrdə rast gəlmək olar. Sosial şəbəkə istifadəçiləri yaşadıqları ərazidə qazın kəsilməsi hallarında öz şikayətini dilə gətirir.
Ən çox şikayət isə qazın aşağı təzyiqlə verilməsindəndir. Bu hal daha çox Səbail, Nərimanov, Binəqədi, Suraxanı, Sabunçu, Xəzər rayonlarının qəsəbələrindən daxil olan şikayətlərdə bildirilir. Şikayətçilər qeyd edir ki, qış girəndən sakinlərin əvvəlcədən pulunu ödəyib aldığı qaz onlara o qədər qənaətlə verilir ki, nə yemək bişirmək, nə də isinmək mümkündür.
Şikayətçilər onu da bildirir ki, onlar qazın nə zaman veriləcəyini öyrənmək üçün "Azəriqaz" İstehsalat Birliyinin "Qaynar xətti" ilə əlaqə saxlamağa cəhd göstərsə də, bu mümkün olmur.
"Azəriqaz" İstehsalat Birliyinin mətbuat xidmətinin rəhbəri İbrahim Kərbəlayev "Bakı-Xəbər"ə açıqlamasında bildirdi ki, hansı ərazidə təbii qazın verilməsi ilə bağlı problemlər varsa, "Çağrı mərkəzi"nə müraciət daxil olur: "Çağrı mərkəzi"nə daxil olan şikayətlərlə bağlı əməkdaşlar tərəfindən yerindəcə baxılıb tənzimlənmə işləri aparılır. Çatışmazlıq varsa, aradan qaldırılır. Həmçinin, həll olunan məsələ ilə bağlı mərkəzin dispetçer xidmətinə məlumat ötürülür".
Həmsöhbətimiz onu da qeyd etdi ki, "Azəriqaz " İstehsalat Birliyinin 104 və 185 saylı "Çağrı mərkəzi" sutkanın 24 saatı fəaliyyət göstərir: "Hətta işçilər bayram günlərində belə gücləndirilmiş iş rejimində çalışır. Müraciət daxil olduqda verilən sualın cavablandırılması bir neçə dəqiqə ərzində həll edilir. Həmin ərəfədə zəng edən digər abonentlər səbrsizlik edib gözləmir. "Çağrı mərkəzi"nə zəng edən bütün abonentlərin probleminin həlli üçün aidiyyəti üzrə istiqamət verilir".
Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirdi ki, bu qış qazla bağlı xeyli problem yaşanıb: "Bu problemlər həm paytaxt Bakıda, həm də rayonlarda baş verib.
Bildiyiniz kimi, ölkədə qazlaşma prosesi gedir. Amma son vaxtlar bu proses zəifləyib. Məsələn, Quba rayonunda təxminən 50 faizə yaxın qazlaşma var. Kəndlərin çoxunda qazlaşma yoxdur. Göründüyü kimi, "Azəriqaz" İstehsalat Birliyi ilə əlaqədar problemlər çoxdur".
Millət vəkilinin sözlərinə görə, "Azəriqaz" İstehsalat Birliyinin 2016-cı il ərzində 144,4 milyon kubmetr təbii qazı itki verməsi böyük itkidir: "İndiki zaman üçün bu qədər itki çoxdur. Ümumiyyətlə, "Azəriqaz" İstehsalat Birliyi itkilərin harada olması ilə əlaqədar müəyyən işlər görməlidir. Bu itkilər boru xəttində ola bilər. Həmçinin ola bilər ki, itkilər başqa yerlərdə olsun. Məsələn, təbii qaz Bakının kəndlərində müəyyən şitilliklər və sahələr var ki, oralara verilir. Amma yazmırlar. Əvvəlki variantlardan istifadə edirlər. Yəni bu, araşdırılmalı məsələdir. Çünki itki həddindən artıq böyükdür. Bu qədər itki ola bilməz".
Onun fikrincə, "Azəriqaz" özəlləşdirilməlidir: "Hesab edirəm ki, "Azəriqaz"ın özəlləşdirilməsinin vaxtı gəlib çatıb. Çünki özəl şirkətlər insanlara yaxşı qulluq etməkdə maraqlı olur. Amma "Azəriqaz" İstehsalat Birliyi dövlət şirkəti olduğu üçün marağı azdır. Bu qədər də itkisi var. Özəl şirkət olsaydı, belə itkiyə yol verməzdi".
Günel CƏLİLOVA
