Ruslan Atakişiyev: "Bu o deməkdir ki, cəmiyyətin maliyyə savadlılığı dərinləşdirilməlidir"
Azərbaycan Banklar Assosiasiyası (ABA) bütün üzv təşkilatlara Maliyyə Savadlığı Şurasının yaradılması təklifi ilə müraciət edib. Şuraya üzv olmaq istəyən banklar bununla bağlı onlara ünvanlanan məktuba martın 10-dək cavab verməlidir. Bu barədə bank dairələrinə istinadən məlumat yayılıb.
"ABA maliyyə savadlığı ilə bağlı fəaliyyətini əsasən törəmə qurumu olan Azərbaycan Bank Tədris Mərkəzi (ABTM) vasitəsilə həyata keçirir. Maliyyə savadlığı ilə əlaqədar planlaşdırılan işlərin birgə müzakirəsi və koordinasiyası məqsədilə ABA-nın nəzdində üzv təşkilatların rəhbərliyindən ibarət (idarə heyəti üzvləri və s.) Maliyyə Savadlığı Şurasının yaradılması nəzərdə tutulur", - deyə məktubda qeyd olunub
Şuranın fəaliyyətinin əsas istiqamətləri, üzvlərlə birlikdə ABTM-in direktoru Cavanşir Abdullayevin iştirakı ilə müəyyən ediləcək. Şura bu sahədə ideyaların, məlumatların və təcrübələrin müzakirə olunduğu platforma rolunda çıxış edəcək.
Bütövlükdə, ekspertlər belə bir şuranın yaradılmasının əhəmiyyətini necə dəyərləndirir? Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin direktoru Ruslan Atakişiyev bir sıra məqamlara toxundu: "Bank sektorunda gedən proseslərlə bağlı "Yol Xəritəsi" hazırlandı. Sözügedən sənəddə nəzərdə tutulan sahələrdən biri də maliyyə sektorunun inkişafı ilə əlaqədardır. "Maliyyə sektorunun inkişafı üzrə Yol Xəritəsi"ndə göstərilib ki, ölkədə maliyyə savadlılığının artırılması ilə bağlı işlər görülməlidir. Yəni bu o deməkdir ki, cəmiyyətin maliyyə savadlılığı dərinləşdirilməlidir. Bunlardan çıxış edərək Azərbaycan Banklar Assosiasiyası və onun nəzdində işləyən Bank Tədris Mərkəzi bu istiqamətdə şura yaratmaq qərarına gəlib. Məsələ ondadır ki, BTM özü maarifləndirmə işləri ilə məşğuldur. Yəni bank sektoru, mühasibatlıq, maliyyə ilə bağlı treninqlər keçirir. Xaricdən ekspertlər cəlb edir və Azərbaycanda mütəxəssislərin iştirakı ilə müxtəlif dərslər təşkil edir. Ona görə də görülən işlər çərçivəsində məqsəd ondan ibarətdir ki, maliyyə savadlılığının artırılması istiqamətində həmin tədris mərkəzi nəzdində gələcəkdə silsilə treninqlər keçirilsin. Yeni maarifləndirmə metodları işlənib hazırlansın".
Vidadi ORDAHALLI
