Zakir Əhmədov: "Əsas odur ki, ölkədə mövcud olan banklar effektiv fəaliyyət göstərsin"
Dünya Bankının maliyyə üzrə aparıcı eksperti Anjella Prxojina mətbuata açıqlamasında bildirib ki, bank Azərbaycanda İnkişaf Bankı qurulması ideyasında maraqlıdır. O bununla bağlı açıqlamasında qeyd edib ki, belə bir bankın yaradılması Azərbaycan Beynəlxalq Bankının (ABB) əsasında mümkündür.
Onun fikrincə, belə bir bankın yaradılması kiçik və orta sahibkarlığın inkişafına kömək edə bilər. DB rəsmisi onu da qeyd edib ki, bundan ötrü bir sıra işlərin görülməsinə ehtiyac var: "Bu təşkilatlar rəqabətli biznes mühiti və maliyyə bazarının səmərəli tənzimlənməsi şəraitində işləməlidir. Eyni zamanda, kredit risqlərini minimuma endirmək üçün əlavə islahatlar aparılmalıdır. Bütün bu islahatlar üçün uzun müddət lazımdır. İnkişaf Bankı iqtisadi inkişaf üçün katalizator olmalıdır".
Məlumat üçün qeyd edək ki, hazırda Azərbaycanda 32 bank fəaliyyət göstərir. Azərbaycan 1992-ci ildən Dünya Bankı ilə əməkdaşlıq edir.
Ümumilikdə, Azərbaycanda İnkişaf Bankı yaradılsa, bu, ölkə iqtisadiyyatının inkişafına necə təsir göstərəcək? Məsələyə münasibət bildirən ekspert Zakir Əhmədovun sözlərinə görə, ölkədə nə qədər ciddi əsaslara söykənən maliyyə qurumları yaradılsa, bu bir o qədər inkişafa stimul verəcək: "Şərt deyil ki, ölkədə 50 bank fəaliyyət göstərsin. Əsas odur ki, ölkədə mövcud olan banklar effektiv fəaliyyət göstərsin. Kiçik və orta sahibkarlara sərfəli şərtlərlə kredit təklif etsinlər. Belə olandan sonra, təbii ki, ölkədə biznes və işgüzar fəallıq daha da artacaq. Eyni zamanda, sahibkarların seçim imkanları daha da genişlənəcək. Çünki hazırkı dövrdə sahibkarlar kredit sarıdan əziyyət çəkir. Bankların təklif etdiyi kreditlərin şərtləri əlverişli deyil. Hesab edirəm ki, Dünya Bankının sözügedən təklifi yenidən ətraflı müzakirə olunmalıdır. Uyğun şərtlər çərçivəsində belə bir bankın yaradılması ölkə iqtisadiyyatının inkişafına müsbət təsir göstərəcək".
Vidadi ORDAHALLI
