Vahid Məhərrəmov: "Ət ixracında istənilən səviyyədə gəlir əldə oluna bilməz, çünki bizdə ət istehsalı çox zəifdir"
Birləşmiş Ərəb Əmirliyinin (BƏƏ) Dubay şəhərində keçirilən "Gulfood 2017" sərgisində "Made in Azerbaijan" vahid ölkə stendində nümayiş olunan Azərbaycan məhsulları ziyarətçilər tərəfindən maraqla qarşılanır.
İqtisadiyyat Nazirliyinin yaydığı məlumata əsasən, xüsusi tərtibatda hazırlanan 128 kvadratmetrlik Azərbaycan stendində nazirliyin dəstəyi, Azərbaycanda İxracın və İnvestisiyaların Təşviqi Fondunun ("Azpromo") təşkilatçılığı ilə Azərbaycanın yerli məhsulları - meyvə şirələri, təbii mineral sular, meyvə-tərəvəz, süd və süd məhsulları, çay, fındıq, konservləşdirilmiş qida məhsulları təqdim edilir.
Sərgi çərçivəsində Azərbaycanın "Azprotein" şirkəti ilə BƏƏ-nin "General Trading Company" şirkəti arasında Dubaya ət ixracına dair müqavilə imzalanıb.
Dubaya ət ixracına dair müqavilə imzalanmasına fikir bildirən aqrar sahə üzrə ekspert Vahid Məhərrəmov "Bakı-Xəbər"ə açıqlamasında qeyd etdi ki, ərəb ölkələrində ətə ehtiyac var: "Nəzərə almaq lazımdır ki, həmin ölkələrdə ət istehsal olunsa da, orada qurbanlıq qoyun ətinə böyük ehtiyac var".
Ekspertin fikrincə, ət məhsuluna ərəb ölkələri ilə yanaşı, Azərbaycanda da böyük ehtiyac var: "Biz daxili istehsal hesabına tələbatın yalnız 40 faizini ödəyə bilərik. Hətta diri heyvan və dondurulmuş ət idxal edirik. Belə olan halda, hansısa ölkəyə ət ixrac etmək daxildə problem yaradacaq. Bu hal ətin qiymətinə təsir edəcək".
V.Məhərrəmov hesab edir ki, ət ixracında istənilən səviyyədə gəlir əldə oluna bilməz. Çünki ət istehsalı çox zəifdir: "Nəzərə almaq lazımdır ki, bizdə ətlik nə qoyun, nə də mal-qara sayı lazımi həcmdə deyil. Bizdə yalnız universal cinslərdir. Onlar da nə süd, nə də ət istehsalında yararlıdır. Onu da unutmaq lazım deyil ki, bizdə yem çatışmazlığı problemi mövcuddur. Həmçinin örüş sahəsinin çatışmazlığı yaşanır. Torpaqlarımızın 20 faizinin işğal altında olması bu sahəyə öz mənfi təsirini göstərir. İşğal altında olan torpaqlarımız örüş sahələri idi".
Günel CƏLİLOVA
