"İran və Türkiyənin məhsulunu ixrac etməklə biz aqrar sahənin inkişafına nail ola bilməyəcəyik"
İran və Azərbaycan kənd təsərrüfatı sahəsində birgə layihələr reallaşdıra bilər. Bunu iqtisadiyyat naziri Şahin Mustafayev Azərbaycan nümayəndə heyətinin İrana həyata keçirilən işgüzar səfərinin nəticələri barədə məlumat verərkən deyib.
Ş.Mustafayevin sözlərinə görə, İranın avtomobil istehsalı sahəsində böyük təcrübəsi var: "Bu təcrübədən yararlana bilərik. Azərbaycanın regionlarında kənd təsərrüfatı texnikasının istehsalına dair birgə müəssisələr təşkil oluna bilər. Səfər zamanı da iranlı iş adamlarının buna marağının şahidi olduq".
İranın kənd təsərrüfatında xeyli tərəqqi əldə etdiyini xatırladan nazir bildirib ki, bu ölkəyə kənd təsərrüfatı torpaqlarından daha da səmərəli istifadə etməsi üçün Azərbaycanın Yer səthini müşahidə peykinin xidmətlərindən istifadə etmək təklif olunub.
Mövzu ilə bağlı ekspertlərə müraciət etdik. Aqrar sahə üzrə mütəxəssis Vahid Məhərrəmov "Bakı-Xəbər"ə açıqlamasında qeyd etdi ki, birgə layihələr barədə bir il əvvəl də məlumat yayılmışdı. Daha sonra Türkiyə ilə birgə ixrac müəssisəsinin yaradılması barədə məlumatlar yayıldı.
Onun fikrincə, birgə müəssisələri yaratmaqda müəyyən məqsəd olmalıdır: "İran və Türkiyənin kənd təsərrüfatı bu gün çox ciddi şəkildə inkişaf edir. Bu ölkələrin ixrac problemi var. Azərbaycanın isə istehsal problemi var. Azərbaycan tərəfi öncə öz problemini həll etməlidir. İran və Türkiyənin məhsulunu ixrac etməklə biz bu sahənin inkişafına nail ola bilməyəcəyik. Beləliklə, normal gəlir əldə olunmayacaq. Bu səbəbdən də bizə lazımdır ki, rəqabət qabiliyyətli, keyfiyyətli məhsul istehsal edək. İstehsal olunan məhsulu bazara çıxarıb gəlir əldə edək. Azərbaycan tərəfi qeyd etdiyim məsələləri həll etməlidir. Zənnimcə, birgə layihələrin perspektivi olmayacaq".
Günel CƏLİLOVA
