Müslüm İbrahimov: "Avropa ölkələri ilə müqayisədə işsizliyin səviyyəsinin aşağı olması sevindiricidir"
"Azərbaycanda işsizliyin səviyyəsi bir çox Avropa ölkələrindən aşağıdır". Bunu əmək və əhalinin sosial müdafiəsi naziri Səlim Müslümov bildirib.
Nazirin dediyinə görə, Azərbaycan Prezidenti İlham Əliyevin qlobal iqtisadi və siyasi çağırışlara adekvat olaraq həyata keçirdiyi uğurlu islahatlar kursu dünya iqtisadiyyatında böhranın dərinləşdiyi 2016-cı ildə və cari ilin ötən dövründə ölkəmizin sosial-iqtisadi inkişafının davam etməsinə şərait yaratmaqla, əmək bazarında sabitliyin qorunub saxlanmasına, işsizlik və yoxsulluğun artmasının qarşısının alınmasına imkan verib: "Dövlət başçısının ilk növbədə milli sahibkarlığın dövlət tərəfindən dəstəklənməsi əsasında iqtisadi şaxələndirməni və qeyri-neft sektorunun sürətli inkişafını, bu sektor üzrə rəqabət qabiliyyətli və ixracyönümlü məhsul istehsalının artımını nəzərdə tutan islahatlar paketi əmək ehtiyatlarından istifadənin genişləndirilməsini də stimullaşdırıb. Ötən il ölkədə 148 mini daimi olmaqla, 190 minə yaxın yeni iş yerinin açılması iqtisadi fəallığın və əmək bazarının qeyd olunan böhranın mənfi təsirlərindən qorunmasında mühüm faktor olub. Xüsusən də dövlət başçısının sosial məsuliyyətin bölüşdürülməsi təşəbbüsünün müsbət nəticəsi kimi, dövlət təşkilatlarında 40 minədək iş yeri yaradılaraq bu barədə məşğulluq orqanlarına vakansiyalar təqdim edilib. Həmin vakant iş yerlərinə göndərişlərin verilməsində şəffaflıq tam təmin olunub. İlk növbədə işsiz və işaxtaran kimi uzun müddət qeydiyyatda olan, iş tapmaqda çətinik çəkən şəxslərin məşğulluğu diqqətdə saxlanmaqla, bu və ya digər ixtisarlar nəticəsində sərbəstləşmiş işçi qüvvəsinin dərhal vakant iş yerlərində yerləşdirilməsi prosesi həyata keçirilib".
Nazir qeyd edib ki, dövlət başçısının əmək resurslarının səmərəli məşğulluğunun təminatı ilə bağlı müəyyən etdiyi vəzifəyə uyğun olaraq, nazirliyin məşğulluq orqanları tərəfindən aktiv məşğulluq tədbirləri ötən il daha da gücləndirilib, bu orqanlar vasitəsilə 2016-cı ildə əvvəlki illə müqayisədə 2 dəfədən çox, yəni 56 631 nəfərin məşğulluğu təmin edilib: "Görülən kompleks tədbirlərin müsbət nəticəsi kimi, bu gün Azərbaycanda işsizlik səviyyəsi əksər ölkələrlə, eləcə də ayrı-ayrı inkişaf etmiş ölkələrlə müqayisədə aşağıdır. Belə ki, işsizlik səviyyəsi İspaniyada 19,6 %, Fransada 9,9 %, Finlandiyada 8,8 %, Xorvatiyada 12,8 %, Belçikada 8 %, Bolqarıstanda 7,7 %, Danimarkada 6,2 %, Latviyada 9,7 %, Litvada 8 %, Portuqaliyada 11,2 %, Slovakiyada 9,7 %, Sloveniyada 7,9 %, İsveçdə 6,9 %, Rumıniyada 6 %, Niderlandda 6 % təşkil etdiyi halda, Azərbaycanda 5 % həddindədir".
İşsizlik səviyyəsinin Avropa ölkələri ilə müqayisədə Azərbaycanda aşağı olmasını müsbət dəyərləndirən iqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, işsizliyin 5 faiz həddində olması stabil rəqəmdir: "Ancaq nəzərə almaq lazımdır ki, işsizlik səviyyəsi çoxşaxəlidir. Elə insanlar var ki, onlar işsiz olması barədə aidiyyəti qurumlara müraciət etmir. Elələri var ki, onlar başqa yerdə çalışmaq üçün çalışdıqları yerdə işdən çıxır. Ola bilər ki, hansısa iş yeri bağlanır və işçi istəməyərəkdən işsiz qalır".
Həmsöhbətimizin sözlərinə görə, Avropa ölkələri ilə müqayisədə işsizliyin səviyyəsinin aşağı olması sevindiricidir: "Azərbaycanda qeydə alınan işsizlikdə hansı meyarın üstünlük təşkil etməsi maraqlıdır".
İqtisad elmləri doktorunun fikrincə, işsiz insanların qeydiyyatdan keçməməsi problemi hələ də yaşanır: "Bu problem tək Azərbaycanda deyil, istənilən Avropa ölkəsində yaşanır".
Günel CƏLİLOVA
