Günel Fərhadqızı: "İlham Əliyevin səfəri ərəb kapitalının ölkəyə axınına stimul verəcək hadisə sayıla bilər"
Qətər dövlətində rəsmi səfərdə olan Azərbaycan Prezidenti İlham Əliyev çox məhsuldar görüşlər keçirib. İlham Əliyevin və Qətər dövlətinin əmiri şeyx Təmim bin Həməd Al Taninin fevralın 27-də geniş tərkibdə və təkbətək görüşü olub.
Fevralın 27-də dövlət başçılarının iştirakı ilə Azərbaycan-Qətər sənədlərinin imzalanması mərasimi keçirilib.
Azərbaycan Respublikasının Prezidenti İlham Əliyev rəsmi səfəri çərçivəsində Dohada "Al Faisal Holding" şirkətinin rəhbəri və Qətər İş Adamları Assosiasiyasının sədri şeyx Faisal bin Qassim bin Faisal Al Tani ilə görüşüb.
Görüşdə Azərbaycan Prezidentinin Qətərə bu səfərinin ikitərəfli əlaqələrimizin genişləndirilməsi baxımından əhəmiyyəti qeyd edilib.
Böyük biznes qurumunun rəhbəri Şeyx Faisal bin Qassim bin Faisal Al Tani Azərbaycana səfərini xatırladaraq, ölkəmizlə bağlı xoş təəssüratlarının olduğunu deyib. Şeyx Azərbaycanın müasir və təhlükəsiz ölkə olduğunu qeyd edib. O, ölkəmizdə Qətər vətəndaşlarına xoş münasibət göstərildiyini məmnunluqla vurğulayıb, yaxın gələcəkdə böyük nümayəndə heyəti ilə Azərbaycana səfər edəcəklərini deyib.
Söhbət zamanı ticarət və investisiya sahələrində əməkdaşlığın perspektivləri müzakirə olunub.
Bu təmaslar və ölkəmizə göstərilən maraq ərəb kapitalının Azərbaycana axını ilə nəticələnə bilərmi?
İqtisadçı Günel Fərhadqızı qəzetimizə açıqlamasında bildirdi ki, ərəb kapitalı bütün dünya üçün cəlbedicidir: "Eyni zamanda, ərəblər kapital qoyuluşu üçün stabil ölkə axtarır. Qətər dövlətinin əmiri Azərbaycan Prezidenti İlham Əliyevlə bundan əvvəl də keçirdiyi görüşlərdə iki ölkə arasında iqtisadi əlaqələrin gücləndirilməsinin önəmini vurğulayıb.
Azərbaycan dəfələrlə bəyan edib ki, postneft dövrünün tələblərinə uyğun olaraq ölkəyə xarici investisiyanı cəlb etməkdə xüsusilə maraqlıdır. Nəzərə alaq ki, ərəb kapitalının Azərbaycana cəlb edilməsi imkanları nisbətən asandır. Bir tərəfdən Azərbaycanla ərəb ölkələrinin münasibətləri yaxşıdır. Digər tərəfdən isə, ərəb kapitalı yeni bazar axtarır və Azərbaycan ərəb kapitalı üçün yeni bazar rolunu oynaya bilər. Son illər ölkəyə gələn ərəb turistlərin sayından da görünür ki, onlar buranı etibarlı bir müsəlman ölkəsi kimi qəbul edir. Qətərin rəhbəri bu fikirləri İlham Əliyevlə keçirdiyi son görüşündə də deyib. Bu baxımdan, İlham Əliyevin səfəri ərəb kapitalının ölkəyə axınına stimul verən hadisə sayıla bilər".
Məhəmmədəli QƏRİBLİ
