Vahid Məhərrəmov: "Toyuq əti məhsullarının qiymətinin bahalaşması səbəbi istehsal vasitələrinin xaricdən gətirilməsidir"
Son bir həftə ərzində toyuq ətinin qiymətinin artdığı bildirilir. Aparılan araşdırmalara görə, qiymət artımı tək toyuq ətinin özünün deyil, eyni zamanda, hissələrə bölünmüş tikələrinin satışında da hiss olunur. Yəni toyuğun filesi, qanadı və digər hissələrə bölünmüş tikələrinin də qiyməti artıb.
Məlumat üçün bildirək ki, toyuq ətinin qiyməti 4 manat 20 qəpik - 4 manat 60 qəpik arasında dəyişməz olaraq qalıb.
Satıcılar filenin qiymətinin 1 manatdan çox artdığını təsdiq edir. Onlar filenin müxtəlif firmalar tərəfindən hazır şəkildə gətirildiyini və qiyməti də firmaların təyin etdiyini iddia edir.
Respublika Quşçular Cəmiyyətinin sədri Aydın Vəliyevin sözlərinə görə, nə toyuğun, nə də filenin qiyməti broylerlər tərəfindən qaldırılmayıb. Belə fakt varsa, qiyməti mağaza sahibləri süni yolla artırıb: "Məhsulun arxasındakı məlumat kağızı mağazada vurulduğundan, qiyməti də onlar təyin edir. Toyuq məhsulunun topdansatış qiymətində heç bir artımdan söhbət gedə bilməz".
Aqrar sahə üzrə ekspert Vahid Məhərrəmov "Bakı-Xəbər"ə açıqlamasında qeyd etdi ki, toyuq əti məhsullarının qiymətinin bahalaşması səbəbi istehsal vasitələrinin xaricdən gətirilməsidir. Yem komponentləri, dərman preparatları, istehsal avadanlıqları və genetik materiallar xaricdən gətirilir. Bu da məhsulun maya dəyərində əhəmiyyətli rol oynayır: "Təkcə yem quş ətinin maya dəyərində 65 faiz təşkil edir. Bütün bunları nəzərə alanda quş ətinin qiyməti idxal vasitələrinin qiymətindən asılı olur".
Ekspert təklif edir ki, qiymət artımının qarşısını almaq üçün yem daxildə istehsal edilsin: "Yem daxildə istehsal olunarsa, bu, məhsulun maya dəyərinin aşağı olmasına təsir göstərər. Belə olan halda, əldə olan məhsul istehlakçılar üçün əlçatan olar. Nəzərinizə çatdırım ki, qonşu ölkələrlə müqayisədə bizdə quş ətinin qiyməti 30-40 faiz yüksəkdir".
Həmsöhbətimizin sözlərinə görə, bayramqabağı alıcılıq qabiliyyətinin artması, istər-istəməz, qiymət artımına təsir edir: "Novruz bayramına kimi sahibkarlar toyuğun qiymətini pillə-pillə qaldıracaq. Toyuq ətinin qiymətinin qalxması ilə bağlı sahibkarlar arasında sövdələşmə də var. Çünki toyuq ətinin qiymətini sahibkarlar eyni vaxtda artırıb. Bəziləri hesab edir ki, bu qiymətlər bayramdan sonra enəcək. Amma mən bunun tam əksini düşünürəm. Bayramdan sonra da toyuq ətinin qiyməti artacaq".
Günel CƏLİLOVA
