Əkrəm Həsənov: "Milli valyuta kütləsi azaldığı üçün..."
"2016-cı ilin yekunlarına nəzər saldıqda görürük ki, bank sektorunda problemlər artıq stabilləşib". Bunu Maliyyə Bazarlarına Nəzarət Palatasının (MBNP) Direktorlar Şurasının sədri Rüfət Aslanlı deyib.
Onun sözlərinə görə, banklarda qeyri-işlək aktivlərin artımı ötən ilin ortalarından sabitləşib və ilin sonuna doğru azalma müşahidə edilib: "Ölkədə intensiv dollarlaşma səviyyəsi də səngiyib və bu gün biz sistemdə kapitalsız bankları görmürük. Bu artıq maliyyə sektorunun keyfiyyətcə yeni bir funksiyada aktiv maliyyə vasitəçisi kimi çalışması istiqamətində ikinci faza tədbirləri realizasiya etməsinə imkan yaradır".
Ölkədə dollarlaşma səviyyəsinin azalması fikrinə münasibət bildirən bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, ötən aylarla müqayisədə dolların alışı azalıb. Həmçinin Mərkəzi Bank milli valyuta kütləsini azaldıb: "Xatırladım ki, ilin əvvəlində Mərkəzi Bank bəyanat yaydı ki, çox sərt pul siyasəti həyata keçirəcək. Bu da o deməkdir ki, milli valyuta kütləsini azaldacaq. Belə olan vəziyyətdə dövriyyədə olan milli valyuta az olduğu üçün, dollar almaq mümkün deyil. Bu nöqteyi-nəzərdən dollarlaşma səviyyəsi azalıb.
Ancaq iqtisadiyyatda isə dolların həcmi çoxalıb. Milli valyuta azalanda dövriyyədə olan dollar çoxalır. Dövriyyədə hazırda bankların əmanəti, həm də sahibkarların ehtiyatı dollara çevrilib. Ehtiyatların hər biri, demək olar ki, dollarla saxlanır".
Həmsöhbətimiz onu da dilə gətirdi ki, hazırda bağlanan müqavilələrdə hansısa qiymət formal olaraq manatla göstərilsə də, dəyəri dollarla danışılır: "Hətta daşınmaz əmlak satanlar bir neçə il əvvəl yaşadığı evin qiymətini manatla ifadə edirdilər. Ancaq indi qiymət dollarla ölçülür. Bu o deməkdir ki, manat dəyər ölçüsü funksiyasını yerinə yetirmir".
Günel CƏLİLOVA
