"Qeyri-neft sektorunda istehsal olunan məhsulların satışı, xarici tərəfdaşların tapılması və onlarla müqavilələrin bağlanması mümkün olacaq"
Məlum olduğu kimi, Prezident İlham Əliyev Rəqəmsal Ticarət Qovşağı kimi Azərbaycanın mövqeyinin gücləndirilməsi və xarici ticarət əməliyyatlarının genişləndirilməsi ilə bağlı əlavə tədbirlər haqqında fərman imzalayıb. Sənəddə vurğulanır ki, məqsəd qeyri-neft sektorunun yüksək inkişaf tempini qoruyub saxlamaqla, ixrac imkanlarını genişləndirmək, rəqabət qabiliyyətini artırmaq, elektron ticarətin hüquqi və infrastruktur bazasını beynəlxalq tələblərə uyğunlaşdırmaqdır. Habelə Azərbaycanın aparıcı mövqeyini gücləndirmək nəzərdə tutulur.
Fərmana görə, İqtisadi İslahatların Təhlili və Kommunikasiya Mərkəzi 4 ay ərzində www.azexport.az internet portalında "Azərbaycan Rəqəmsal Ticarət Qovşağı" bölməsinin yaradılmasını təmin etməlidir. Həmin bölmə sahibkarlıq fəaliyyətinin həyata keçirilməsi ilə əlaqədar Azərbaycanda vergi ödəyicisi kimi qeydiyyatdan keçmiş şəxslərlə onların xarici biznes tərəfdaşları arasında müqavilələrin elektron formada tərtibinə və imzalanmasına imkan verməlidir.
Bundan əlavə, 3 ay ərzində qeyri-neft məhsullarının ixracı ilə məşğul olan şəxslərə ixrac təşviqinin ödənilməsindən ötrü müraciətlərin göndərilməsinə imkan verən elektron xidmətlər yaradılması təmin olunmalıdır. Həmçinin, bir sıra müvafiq qurumlar birlikdə fərmandan irəli gələn məsələləri həyata keçirməlidir. Fərmanda bəzi tədbirlərin maliyyələşdirilməsindən ötrü mərkəzə 450 min manat ayrılması nəzərdə tutulur.
Ümumilikdə, xarici ticarət əməliyyatları ilə bağlı Prezidentin imzaladığı fərmana ekspertlərin münasibəti necədir? Bu, xarici ticarət əlaqələrində nə kimi imkanlar yaradacaq? Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Vüqar Bayramovun sözlərinə görə, bu, xarici ticarət əlaqələrində vaxt itkisinin qarşısını alacaq: "Bu imkan verəcək ki, sahibkarlar elektron formada müqavilələr imzalasın və bu minvalla zamana qənaət etsinlər. Daha qısa zamanda müqavilələrin imzalanması tərəfdaşlığı mümkün edəcək. Xüsusən də xarici tərəfdaşlar üçün əməkdaşlıq vacibdir. Bu imkan verəcək ki, ölkə sahibkarları qısa müddətdə özlərinə xarici tərəfdaşlar tapsın. Yaranan şərait imkan verəcək ki, sahibkarlar birgə layihələr həyata keçirsin. Bu da, nəticə etibarilə, azexport.az saytının imkanlarının istifadə edilməsi deməkdir. Yəni elektron müqavilələrin bağlanması və saytın bölməsində saxlanmasına imkan yaranacaq. Bu minvalla qeyri-neft sektorunda istehsal olunan məhsulların satışı, xarici tərəfdaşların tapılması və onlarla müqavilələrin bağlanması mümkün olacaq. O baxımdan hesab edirəm ki, sahibkarlığın inkişafı üçün bu qərar mühüm əhəmiyyət kəsb edir. Ən başlıcası isə, bu, ölkə sahibkarlarının ixrac imkanlarını genişləndirəcək". Vidadi ORDAHALLI
