Gəncləri evlə təmin etmək mexanizmləri aktuallaşdı

Tarix: 01.07.2014 / 05:52
Bölmə: İqtisadiyyat

Məlumata görə, Azərbaycanda sosialyönümlü xalq evləri tikiləcək. Milli Məclisdə müzakirəyə çıxarılacaq Mənzil Məcəlləsinə dəyişikliklər və əlavələrdə sosialyönümlü evlərin tikintisi nəzərdə tutulub. Millət vəkili Hadı Rəcəblinin sözlərinə görə, əslində dövlət bu evləri gənclərə bağışlayacaq: "Amma simvolik olaraq ev verilmiş şəxs kredit ödəyəcək.
Faktiki olaraq bu, bağışlamağın bir növüdür. Bu bizim dövlət başçısının bir istəyidir. Bu da zaman-zaman həyata keçirilir və keçiriləcək də".
Milli Məclisin Sosial siyasət komitəsinin sədri Hadı Rəcəbli sosialyönümlü ev fürsətindən faydalana bilmələri üçün gənc ailələrə iş təklif oluna biləcəyini də deyib: "Onlar nikaha girən zaman birinə mütləq iş verilsin ki, bununla da sosial durumu ağır olan gənc ailəyə faizsiz uzunmüddətli ipoteka krediti verək. Bu ona oxşayacaq ki, belə ailə kirayə haqqı verəcək, amma 25 ildən sonra ödədiyi kirayə haqqına görə ev ona qalacaq. Əlbəttə, bunun üçün maliyyə dəstəyi olmalıdır. Yəni ilkin ödənişi bank ödəməlidir".
Ekspertlər gənc ailələr üçün sosialyönümlü evlərin inşa olunmasını alqışlayır.
İqtisadçı-ekspert Aydın Hüseynov "Bakı-Xəbər"ə açıqlamasında qeyd etdi ki, Azərbaycanda həyata keçirilən dövlət siyasətinin əsas prioritetlərindən biri ölkə gənclərinin fəal həyat tərzini təşviq və onların cəmiyyətə inteqrasiyasını təmin etməkdən ibarətdir: "Ötən dövr ərzində gənclərin problemləri ilə daha yaxından tanış olmaq, onların məşğulluğunu təmin etmək, eləcə də gənclərin irəli sürdüyü təşəbbüsləri dəstəkləmək məqsədilə şəhər, rayon icra hakimiyyəti başçıları yanında gənclərdən ibarət məşvərətçi orqan olan şuralar yaradılacaq, gənclər siyasəti ilə bağlı işlərə yerli bələdiyyə orqanlarının fəal surətdə cəlb edilməsini təmin etmək məqsədilə mühüm addımlar atılıb. İpoteka Proqramı çərçivəsində yüzlərlə gənc ailə güzəştli şərtlərlə mənzil əldə edib. "Dövlət Gənclər Siyasəti haqqında" Qanunda və "Azərbaycan gəncliyi 2011-2015-ci illərdə" Dövlət Proqramında gənc ailələrə güzəştli şərtlərlə ipoteka kreditlərinin verilməsi öz əksini tapıb və onlar bu siyasətdən bəhrələnib".
Onun sözlərinə görə, dövlət gənclərin sosial şəraitinin yaxşılaşdırılması ilə bağlı siyasətini davam etdirir və bu, dövlət siyasətinin ən mühüm prioriteti kimi nəzərdə tutulub: "Azərbaycan hökuməti yaxın illərdə gənclərin məşğulluğunu təmin etmək, sosial şəraitini yaxşılaşdırmaq, o cümlədən mənzil-məişət şəraiti ilə bağlı mühüm layihələr həyata keçirmək, bu tədbirləri kompleks şəkildə icra etmək üçün ayrıca strateji Dövlət Proqramı hazırlayaraq həyata keçirəcək.
Əsas məsələlərdən biri gənc ailələrə ipoteka kreditlərinin verilməsi qaydalarının sadələşdirilməsindən ibarətdir . Belə ki, yeni hazırlanan Dövlət Proqramında gənclərin sosial problemlərinin həlli, məşğulluq məsələləri və gənc ailələrə ipoteka kreditlərinin verilməsi ayrıca bənd kimi daxil edilib. Təkliflərə əsasən, gənc alimlər, Milli Qəhrəmanlar və onların ailə üzvlərindən olan gənclər, beynəlxalq aləmdə yüksək nəticələr qazanan idmançılar, dövlət qulluğunda çalışan gənclər, qaçqın və məcburi köçkün ailələrindən olan istedadlı gənclər güzəştli şərtlərlə ipoteka kreditləri ala biləcək. Eyni zamanda, mənzilə ehtiyacı olan digər kateqoriyalara da güşəştlər şamil olunacaq.
2014-2017-ci illərdə gənclər siyasətinin əsas istiqamətlərindən biri gənclərin mənzil ehtiyaclarının həll olunmasından ibarətdir. Bu məqsədlə gənclərin və gənc ailələrin mənzil ehtiyaclarının ödənilməsi məqsədilə sosial ipotekanın şərtləri daha da təkmilləşdiriləcək, gənclər, o cümlədən sağlamlıq imkanları məhdud olan gənclər üçün istirahət və təlim mərkəzləri istifadəyə veriləcək.
Həmçinin, qarşıdakı illərdə gənclərə hərtərəfli şəraitin yaradılması məqsədilə bir sıra tədbirlər nəzərdə tutulub.
Gənclər, xüsusən ucqar və kənd yerlərində yaşayan gənclər üçün məlumat-məsləhət xidmətləri şəbəkəsi genişləndiriləcək".
Həmsöhbətimiz onu da əlavə etdi ki, gənc nəslin iş bacarıqlarının inkişafı məqsədilə gənclərin əmək və iqtisadi əlaqələrə erkən yiyələnməsi üçün səmərəli forma və metodlar tətbiq ediləcək. Ölkə və xarici təhsil müəssisələrini bitirmiş gənc mütəxəssislərin Azərbaycanın bölgələrində işləməsinin təşviq edilməsi, bununla əlaqədar onlar üçün əlavə sosial dəstək mexanizmlərinin yaradılması və tətbiqi təmin ediləcək: "Bundan başqa, gənclərin hərtərəfli inkişafı üçün şəraitin yaradılması, onların məşğulluğunun artırılması, mülkiyyət formasından asılı olmayaraq, müəssisə və təşkilatlarda işlə təmin edilməsi, əmək bazarının tələblərinə cavab verən rəqabətədavamlı gənc kadrların hazırlanması, dövlət qulluğunda və idarəetmədə peşəkar və bilikli gənclərin sayının artırılması, gənclər arasında sahibkarlığın inkişaf etdirilməsi nəzərdə tutulur".